ඓතිහාසික ඇසළ පෙරහැර මංගල්‍යය පෞරාණික චාරිත්‍රානුකූලව පවත්වා ගැනීම සඳහා එහි නර්ථන කණ්ඩායම්, පෙරහැරේ ගමන් ගන්නා පිරිස් සහ දායකත්වය දක්වන ආයතන සතු කාර්යයභාරය නිශ්චිත කොට ගැසට් මගින් ප්‍රකාශ කිරීමට රජය තීරණය කොට තිබේ.
පෙරහැර විවෘති කිරිම, විවිධ අංග ඇතුල් කිරීම ආදිය මෙමගින් වැළැක්වෙන අතර සම්ප්‍රදාය රැක ගැනීමේ අරමුණින් මෙම ගැසට් කිරීම අපේක්ෂාවක් යැයි දියවඩන නිලමේ ප්‍රදීප් නිලංග දෑල මහතා සඳහන් කරයි.
ඉකුත් වර්ෂයේ ඇසළ පෙරහැර මංගල්‍ය නිමාවට පත් බව සඳහන් පෙරහැර සන්දේශය ජනාධිපති රනිල් වික්‍රමසිංහ මහතාට භාර දෙන අවස්ථාවේදී දියවඩන නිලමේවරයා කළ ඉල්ලීමක් අනුව මෙම නව වැඩපිළිවෙල ක්‍රියාත්මක වේ.
මේ සම්බන්ධ විශේෂ සාකච්ඡාවක් ජනාධිපති ලේකම් සමන් ඒකනායක මහතාගේ ප්‍රධානත්වයෙන් ශ්‍රී දළදා මාලිගාවේදී පැවැති අතර ශ්‍රී දළදා මාලිගාව හා සිව් මහා දේවාල සතු නර්ථනාංග ආදි සියලු අංග මේ යටතේ ගැසට් ගත කිරීමට නියමිතය.
දේවාලවල බස්නායක නිලමේවරු නොවන පුද්ගලයන් පවා උඩරට ඇදුමින් සැරසී පෙරහැරේ ගමන් කිරීම මෙමගින් වැළැක්වෙන අතර පෙරහැර සම්ප්‍රදාය ආරක්ෂා කර ගැනිමට නව වැඩසටහන තුළින් අවස්ථාව හිමිවන බව ද දියවඩන නිලමේවරයා වැඩිදුරටත් සඳහන් කරයි.
