ශ්රී ලංකාවේ දකුණු කොරියානු තානාපති මියොන් ලී (Miyon Lee) මැතිණිය පසුගියදා (06) පාර්ලිමේන්තුවේ දී කථානායක ගරු මහින්ද යාපා අබේවර්ධන මහතා හමුවූවාය.
මෙම අවස්ථාවට විපක්ෂ නායක සජිත් ප්රේමදාස, ශ්රී ලංකා – දකුණු කොරියා පාර්ලිමේන්තු මිත්රත්ව සංගමයේ සභාපති පාර්ලිමේන්තු මන්ත්රී දයාසිරි ජයසේකර, උප සභාපති අධ්යාපන රාජ්ය අමාත්ය අරවින්ද් කුමාර් සහ භාණ්ඩාගාරික පාර්ලිමේන්තු මන්ත්රී ජේ.සී. අලවතුවල යන මහත්වරු සහභාගී වූහ.
එසේම පාර්ලිමේන්තුවේ වැඩ බලන මහලේකම් චමින්ද කුලරත්න මහතා ද මෙම අවස්ථාවට එක්විය.
මෙහි දී අදහස් දක්වමින් දකුණු කොරියානු තානාපතිවරිය සඳහන් කළේ දකුණු කොරියාවේ උසස් අධ්යාපනය සඳහා ශ්රී ලාංකීය සිසුන්ට වැඩි අවස්ථාවක් ලබාදීමට ඉදිරියේදී බලාපොරොත්තු වන බවයි.
එසේම එලඹෙන ජුනි මාසයේදී කොරියානු අධ්යාපන ප්රදර්ශනයක් අධ්යාපන අමාත්යාංශයේ සහ මෙරට විශ්වවිද්යාලවල සහයෝගය ඇතිව පවත්වන බව ද ඇය සඳහන් කළාය.
අධ්යාපන රාජ්ය අමාත්ය අරවින්ද් කුමාර් මහතා අදහස් දක්වමින් මෙරට පාසල්වල කොරියානු භාෂාව ඉගැන්වීම වැඩිකිරීම අවශ්ය බවත් ඒ වෙනුවෙන් අවශ්ය සහය ලබා දෙන ලෙසත් ඉල්ලා සිටියේය.
මේ සම්බන්ධයෙන් ද අවශ්ය සහය ඉදිරියේදී ලබාදීමට කටයුතු කරන බව තානාපතිවරිය මෙහි දී සඳහන් කළාය.
තවද විපක්ෂ නායක සජිත් ප්රේමදාස මහතා දකුණු කොරියාවෙන් මෙරටට ලබා දී ඇති රැකියා අවස්ථා සම්බන්ධයෙන් සිය ස්තූතිය පළ කළ අතර සිය පියා වන හිටපු ජනාධිපති දිවංගත රණසිංහ ප්රේමදාස මහතා “ගම් උදාව” වැඩසටහන සකස් කිරීමේ දී එවකට කොරියානු ජනාධිපතිවරයෙකු වූ පාක් වුන්ග් හී (Park Chung Hee) එරට තුළ ක්රියාත්මක කළ ක්රමවේදයන් අනුගමනය කළ බවද පැවසීය.
එසේම නුදුරේ දී දකුණු කොරියාවේ පැවැත්වීමට නියමිත මැතිවරණය සම්බන්ධයෙන් ද මෙහි දී අවධානය යොමු විය.
තවද දකුණු කොරියානු රාජ්ය මඟින් ශ්රී ලාංකිකයින් වෙනුවෙන් ඉදිරියේ දී පුහුණු වැඩසටහන් සංවිධානය කිරීමේ අවශ්යතාව ද මෙහි දී කථානායකවරයා පෙන්වා දුන් අතර දෙරට අතර ද්වීපාර්ශවික සම්බන්ධතා ශක්තිමත් කර ගැනීම සම්බන්ධයෙන් ද මෙහි දී පුළුල් ලෙස සාකච්ඡා විය.
මීට අමතරව විවිධ කටයුතුවලදී ශ්රී ලංකා – දකුණු කොරියා පාර්ලිමේන්තු මිත්රත්ව සංගමය ලබාදෙන සහයෝගය සම්බන්ධයෙන් ද දකුණු කොරියානු තානාපතිවරිය මෙහි දී සිය ස්තූතිය පළ කළාය.
