කැනඩාවේ රැකියා ලබාදෙන බව පවසා රුපියල් ලක්ෂ 149 ක මුදලක් වංචාකල පුද්ගලයෙකු ශ්රි ලංකා විදේශ සේවා නියුක්ති කාර්යාංශයේ විශේෂ විමර්ශන අංශයේ පොලිස් ඒකකයේ නිළධාරීන් විසින් ඊයේ දින (9) කාර්යාංශය තුළදී අත්අඩංගුවට ගෙන තිබෙනවා.
මෙසේ අත්අඩංගුවට ගෙන ඇත්තේ සිංහාරගේ ජනක සිල්වා නම් අයෙකු වන අතර, ඔහු කැනඩාවේ ස්ථිර පදිංචිය සඳහා ගොස් එරට පුරවැසිභාවයද ලබා ඇති අයෙකි.
එම තත්ත්වය උපයෝගි කරගනිමින් මොහු පුද්ගලයින්ගෙන් රැසකගෙන් මුදල් අයකර ඇති අතර, ඔහුගේ ජාවාරමට හසුවූ පුද්ගලයින් දස දෙනෙකු කාර්යාංශය වෙත පැමිණ පැමිණිලි ඉදිරිපත් කර තිබෙනවා.
ඒ අනුව කාර්යාංශය විසින් මෙම සැකකරු පිළිබඳව අධිකරණයට කරුණු වාර්තා කිරීමෙන් අනතුරුව විදේශ ගමන් තහනමක්ද පනවා තිබෙනවා.
පොලිස් උපායදූතයෙකු මාර්ගයෙන් ඔහුගේ විදේශ ගමන් තහනම ඉවත් කරගත හැකි බව පවසා සැකකරු ඊයේ(09) දින කාර්යාංශය වෙත කැඳවා ප්රශ්න කිරීමෙන් අනතුරුව වලංගු බලපත්රයක් නොමැතිව විදේශ රැකියා සඳහා බඳවාගැනීමට මුදල් අයකිරීම හා වංචා සිදුකිරීම යන චෝදනාවට එරෙහිව විමර්ශන නිළධාරීන් විසින් මෙම පුද්ගලයා අත්අඩංගුවට ගත් අතර, අද දින (10) කඩුවෙල මහේස්ත්රාත් අධිකරණයට ඉදිරිපත් කිරීමට නියමිතයි.
මේ අතර, ෆෙස්බුක් සමාජ මාධ්ය ඔස්සේ රුමේනියාව, පෝලන්තය, ජර්මනිය වැනි රටවල රැකියා ලබාදෙන බව පවසා දැන්වීම් පළකර මුදල් අය කළ මාවනැල්ල ප්රදේශයේ පදිංචි පුද්ගලයෙකුද විශේෂ විමර්ශන අංශයේ පොලිස් ඒකකයේ නිළධාරීන් විසින් ඊයේ දින (9) කාර්යාංශය තුළදී අත්අඩංගුවට ගෙන තිබෙනවා.
සැකකරු මාවනැල්ල ප්රදේශයේ නිව් රෝයල් රෙක්රූට්මන්ට් නමින් කාර්යාංශයේ වලංගු බලපත්රයක් නොමැතිව නීතිවිරෝධි ආයතනයක් පවත්වාගෙන ගොස් ඇති අතර, එමගින් විදේශ රැකියා ලබාදෙන බව පවසා රුපියල් ලක්ෂ තුනක මුදලක් ලබාගෙන පොරොන්දු වූ පරිදි රැකියාව ලබානොදුන් බවට කාර්යාංශය පැමිණිල්ලක් ලැබී තිබෙනවා.
ඒ අනුව ප්රකාශ සටහන් කරගැනීම සඳහා මෙම පුද්ගලයා කැඳවා ඇති අතර, ප්රකාශ සටහන් කරගැනීමෙන් අනතුරුව ඔහු අත්අඩංගුවට ගෙන තිබෙනවා.
සැකකරු පුද්ගලික අධ්යාපන ආයතනයක් පවත්වාගෙන යමින් ගුරුවරයෙකු වශයෙන්ද කටයුතු කරන අයෙකි.
ඔහුට එරෙහිව තවදුරටත් කාර්යාංශය වෙත පැමිණිලි ලැබෙමින් පවතින අතර, ඊට අදාළවද විමර්ශන සිදු කරමින් පවතිනවා.
අත්අඩංගුවට ගත් සැකකරු අද දින (10) මාවනැල්ල මහේස්ත්රාත් අධිකරණය වෙත ඉදිරිපත් කිරිමට නියමිතයි.
විදේශ කටයුතු හා විදේශ රැකියා නියෝජ්ය අමාත්ය අරුන් හේමචන්ද්ර මහතාගේ අදහසක් අනුව ආරම්භ කරන ලද මෙම පොලිස් ඒකකයට විදේශ රැකියා වංචනිකයින් සම්බන්ධව පැමිණිලි විශාල ප්රමාණයක් ලැබෙන අතර, එම පැමිණිලි අනුව සැකකරුවන් අත්අඩංගුවට ගැනීම සඳහා විමර්ශන නිළධාරීන් විසින් සිදුකරන මෙහෙයුම් පුළුල් කර තිබෙනවා.
වංචනික විදේශ රැකියා ආයතන හෝ පුද්ගලයින් පිළිබඳව තොරතුරු දන්නේ නම් 0112882228 අංකය ඔස්සේ කාර්යාංශ විශේෂ විමර්ශන අංශය යටතේ ස්ථාපිත පොලිස් ඒකකයට දැනුම් දෙන ලෙස කාර්යාංශය මහජනතාවගෙන් ඉල්ලා සිටිනවා.
