ශ්‍රී ලංකාවට ජාත්‍යන්තර මූල්‍ය අරමුදලේ ණය මුදල ලබා ගැනීම සඳහා විධායක කමිටුවේ අනුමැතිය ලබා ගැනීමට අවශ්‍ය මූල්‍ය සහතික අවශ්‍ය කාලයේදී ලබා දීම සඳහා සලකා බලන බව එක්සත් රාජධානියේ ජාත්‍යන්තර සංවර්ධනය සඳහා අමාත්‍ය ඈන්මරී ටේ‍රවෙලියන් මහත්මිය ප්‍රකාශ කර තිබෙනවා.
පැරිස් සමාජයේ සාමාජිකයකු ලෙස ඒ සඳහා එක්සත් රාජධානිය සුදානමින් සිටින බවයි එක්සත් රාජධානියේ ජාත්‍යන්තර සංවර්ධනය සඳහා අමාත්‍ය ඈන්මරී ටේ‍රවෙලියන් මහත්මිය පසුගියදා බි්‍රතාන්‍ය පාර්ලිමේන්තුවේදී ප්‍රකාශ කර ඇත්තේ.
ණය ප්‍රතිව්‍යුහගත කරන සාකච්ඡාවේදී පැරිස් සමාජයේ සාමාජිකයන් සහ අනෙක් ණය හිමියන් සම්බන්ධීකරණය කිරීම සඳහා යෝජිත වේදිකාවට එක්සත් රාජධානිය සම්පූර්ණ සහාය දක්වන බවද ඇය ප්‍රකාශ කර තිබෙනවා. එමෙන්ම ශ්‍රී ලංකාවේ ණය තිරසරභාවය නැවත ඇති කිරීම සඳහා එය වඩාත් කාර්යක්ෂම ක්‍රමයක් බව එක්සත් රාජධානිය විශ්වාස කරන බවයි එහිදී ඈන්මරී ටේ‍රවෙලියන් මහත්මිය පවසා ඇත්තේ.
ශ්‍රී ලංකාවට තිරසර ආර්ථික වර්ධන මාවතකට පැමිණීමටත් ජාත්‍යන්තර මූල්‍ය අරමුදලේ වැඩසටහනක් ලබා ගැනීමටත් ණය හිමියන් සියලු දෙනා අතර ඵලදායි සාකච්ඡාවක් ඇති විය යුතු බවද ඈන්මරී ටේ‍රවෙලියන් මහත්මිය ප්‍රකාශ කළා.
ආර්ථික විද්‍යාඥයන් සහ විද්වතුන් ශ්‍රී ලංකාවේ ණය ප්‍රතිව්‍යුහගත කිරීමේ බර, ණය හිමියන් දරා ගත යුතු යැයි කළ ප්‍රකාශය සම්බන්ධයෙන් කොන්සර්වටිව් පක්ෂයේ පාර්ලිමේන්තු මන්ත්‍රී බොබ් බ්ලැක්මන් නගා තිබූ ප්‍රශ්නයකට පිළිතුරු දෙමින් ඈන්මරී ටේ‍රවෙලියන් මහත්මිය මේ බව ප්‍රකාශ කර ඇති බව සඳහන්.
මේ අතර ශ්‍රී ලංකාවට සහාය වීම සඳහා ජපානය දැඩිව වෙහෙස වී කටයුතු කරන බව ජපානයේ ජාත්‍යන්තර කටයුතු පිළිබඳ මුදල් නියෝජ්‍ය අමාත්‍ය මසාතෝ කන්ඩා මහතා රොයිටර් පුවත් සේවයට ප්‍රකාශ කර තිබෙනවා.
ණය අර්බුදයට මුහුණදෙන රටවලට සහාය වීමේදී ශ්‍රී ලංකාවට ප්‍රමුඛත්වයක් ලබාදෙන බවයි නියෝජ්‍ය අමාත්‍ය මසාතෝ කන්ඩා මහතා එහිදී පවසා ඇත්තේ.
