මහනුවර ඇසළ පෙරහර මංගල්‍යය සඳහා විදුලි ආලෝකය ලබාදීම වෙනුවෙන් වැයවන සම්පූර්ණ මුදල රජයෙන් දැරීමට තීරණය කර ඇති බව මහනුවර දිස්ත්‍රික් ලේකම් චන්දන තෙන්නකෝන් මහතා පවසනවා.
මෙවර මහනුවර ඇසළ පෙරහර මංගල්‍යයේ සංවිධාන කටයුතු පිළිබඳ පැවැති සාකච්ඡාවකදීයි දිස්ත්‍රික් ලේකම්වරයා මේ බව ප්‍රකාශ කර ඇත්තේ.
පෙරහර වීදී සංචාරය කරන දින 10 ට අදාළව විදුලි බල මණ්ඩලය මගින් ශ්‍රී දළදා මාලගාවට සහ සතර මහා දේවාල සඳහා ඇස්තමේන්තු විදුලි බිලක් ඉදිරිපත් කළ අතර එය ගෙවිය නොහැකි බව සතර මහා දේවාල බස්නායක නිළමේවරු මින් පෙර ප්‍රකාශ කර තිබුනා.
පෙරහර මංගල්‍යය සඳහා විදුලි ආලෝකය ලබාදීමට රුපියල් එක්කෝටි තිස් දෙලක්ෂ අනූනව දහසක ඇස්තමේන්තුවක් විදුලි බල මණ්ඩලය මගින් ඉදිරිපත් කර තිබෙනවා.
විදුලි බල මණ්ඩලය මගින් ඉදිරිපත් කළ ඇස්තමේන්තු මුදල සාකච්ඡා හේතුවෙන් රුපියල් ලක්ෂ 71 ක් දක්වා අඩුකර ගත් බවත් එම මුදල රජය විසින් දරන බවත් මහනුවර දිස්ත්‍රික් ලේකම්වරයා වැඩිදුරටත් කියා සිටියා.
