වසරේ ගතවූ කාලය තුළ වාර්තා වූ ඩෙංගු රෝගීන් සංඛ්‍යාව තවදුරටත් ඉහළ යමින් පවතින බව ජාතික ඩෙංගු මර්දන ඒකකය පවසනවා.
ඒ අනුව මේ විට මෙරටින් වාර්තා වූ ඩෙංගු රෝගීන් සංඛ්‍යාව 68,672ක් බවයි එම ඒකකය අවධාරණය කලේ.
එමෙන්ම පසුගිය 11 වැනි දින සමස්ත ඩෙංගු රෝගීන් ප්‍රමාණය 68,071ක් වාර්තා වී ඇති අතර ඊයේ මධ්‍යම රාත්‍රිය වන විට එම රෝගීන් සංඛ්‍යාව 601 කින් වැඩිවී තිබෙනවා.
මින් වැඩිම රෝගීන් සංඛ්‍යාවක් වාර්තා වී ඇත්තේ බස්නාහිර පළාතෙන් වන අතර එම රෝගීන් සංඛ්‍යාව 36,118ක් වනවා.
එමෙන්ම බස්නාහිර පළාතේ වැඩිම රෝගීන් සංඛ්‍යාවක් වාර්තා වී ඇත්තේ ගම්පහ දිස්ත්‍රික්කයෙන් වන බවයි ජාතික ඩෙංගු මර්ධන ඒකකය සදහන් කලේ.
එම රෝගීන් සංඛ්‍යාව 14,112ක් වන අතර කොළඹ දිස්ත්‍රික්කයෙන් රෝගීන් 13,791ක්ද වාර්තා වී තිබෙනවා.
ජූලි මාසයේ ගතවූ දින 12 තුළ රෝගීන් 13,293ක් වාර්තා වී ඇති බවද එම ඒකකය අවධාරණය කරනවා.
මේ අතර දිවයින පුරා හඳුනාගත් අධි අවදානම් සහිත ඩෙංගු කලාප 60 ක් ආවරණය වන පරිදි විශේෂ ඩෙංගු මර්දන වැඩසටහනක් අද සිට ආරම්භ කරන බව ජාතික ඩෙංගු මර්ධන ඒකකය පවසනවා.
