වෘත්තීයවේදීන්ගේ වෘත්තීය සමිති එකමුතුවේ නියෝජිතයින්ගේ විශේෂ හමුවක් අද පැවත්වෙනවා.
ඒ, රුපියල් ලක්ෂය ඉක්මවන මාසික ආදායම් මත 6% සිට 36% දක්වා බදු අය කරන ආණ්ඩුවේ ප්‍රතිපත්තිය වහා හකුලා ගන්නැයි බලකරමින් පසුගිය සතියේ ක්‍රියාත්මක කළ කළු විරෝධතා සතියේ ඉදිරි පියවර පිළිබඳව සාකච්ඡා කිරීම සඳහායි .
වෘත්තීයවේදීන්ගේ වෘත්තීය සමිති එකමුතුව නියෝජනය කරන විශ්වවිද්‍යාල ආචාර්යවරුන්ගේ සමිති සම්මේලනයේ සභාපති ශ්‍යාම් බන්නැහැක මහතා සඳහන් කළේ, මෙම හමුව සඳහා වෘත්තීය සමිති 30ක පමණ නියෝජිතයින් සහභාගි වීමට නියමිත බවයි.
මේ අතර නව සේවක වැටුප් බදු ක්‍රමය අනුව ජනවාරි මාසයේ ශ්‍රී ලංකා ක්‍රිකට් ආයතනයේ බදු ගෙවන සේවක පිරිස 200කට වැඩි වන බව වාර්තා වනවා.
එම පිරිස අතර රියදුරන් ද සිටින අතර මසකට ලක්ෂ 3කට වඩා වැටුප් ලබන රියදුරන් පිරිසක් ද සිටීම විශේෂත්වයක්.
අධි තාක්ෂණ අංශයට අයත් පුහුණුකරුවන් එහි වැඩිම මාසික වැටුප් ලබන්නන් වන අතර ඔවුන් ලක්ෂ හතරේ සිට පහළව දක්වා වැටුපක් ලබන බවටයි වාර්තා වන්නේ.
එමෙන්ම මෙම බදු සංශෝධනයට එරෙහිව කොළඹ වරායේ සිය`ඵ සේවකයින් අද දින පැයක කාලයක් සිය සේවාවලින් ඉවත්ව උද්ඝෝෂණයක නිරත වන බවයි ශ්‍රී ලංකා වරාය අධිකාරියේ වෘත්තීය සමිති පවසන්නේ.
