රජයේ වී මිලදී ගැනීමේ සහ වී තොග බැහැර කිරීමේ වැඩසහනට අදාළ චක්‍රලේඛය මහා භාණ්ඩාගාරය විසින් නිකුත් කර තිබෙනවා.
මුදල්, ආර්ථික ස්ථායිකරණ සහ ජාතික ප්‍රතිපත්ති අමාත්‍යවරයා ලෙස ජනාධිපති රනිල් වික්‍රමසිංහ මහතාගේ උපදෙස් පරිදි මහා භාණ්ඩාගාර ලේකම් කේ.එම්. මහින්ද සිරිවර්ධන මහතාගේ අත්සනින් යුතුවයි මෙම චක්‍රලේඛය නිකුත් කර ඇත්තේ.
2022 – 2023 මහ කන්නයේ වී අස්වැන්න සඳහා ගොවීන් සාධාරණ මිලක් ලබා දීමත්, අතිරික්ත වී රජය විසින් මිලදී ගැනීමත්, පවතින දුෂ්කර ආර්ථික තත්ත්වය හමුවේ පීඩාවට පත්ව සිටින අඩු අදායාම්ලාභී පවුල්වලට සහන සැලසීමත් මෙම වැඩසටහනේ අරමුණයි.
මේ අතර මහ කන්නය සඳහා වී මිලදී ගැනීම සම්බන්ධයෙන් රජය නිකුත් කළ චක්‍රලේඛය ජාතික ගොවිජන එකමුතුව විසින් අද ගිනි තබනු ලැබුවා.
එම සංවිධානය පවසන්නේ රජය රුපියල් 100ක මිලකට වී මිලදී ගන්නා බව ප්‍රකාශ කළද වී රුපියල් 80ක මිලකට පමණක් මිලදී ගන්නා බවටයි.
අද පැවති මාධ්‍ය හමුවකදී ජාතික ගොවිජන එකමුතුවේ සභාපති අනුරාධ තෙන්නකෝන් මහතා පැවසුවේ වී මිලදී ගැනීම සඳහා මිල සූත්‍රයක් සකස් වී නොමැති බවයි.
මේ අතර වී මිල සම්බන්ධයෙන් කෘෂිකර්ම අමාත්‍ය මහින්ද අමරවීර මහතා ඊයේ කළ ප්‍රකාශයට ගොවි ජනතාව අද විරෝධය පළ කළා.
කෘෂිකර්ම අමාත්‍ය මහින්ද අමරවීර මහතාගේ අනුරුවක් පු`ඵස්සමින් මෙලෙස විරෝධය දක්වනු ලැබුවා.
