2024 පෝෂණ මාසයේ ‘ජාතික සැමරුම් උත්සවය’ ගාල්ලේදී

2024 ජුනි මාසය ජාතික පෝෂණ මාසය ලෙස සෞඛ්‍ය අමාත්‍යාංශය විසින් නම් කර ඇති අතර ඒ වෙනුවෙන් පැවැත්වෙන ජාතික සැමරුම් උත්සවය පසුගිය (26)දා සෞඛ්‍ය හා කර්මාන්ත අමාත්‍ය වෛද්‍ය රමේෂ් පතිරණ මහතාගේ ප්‍රධානත්වයෙන් ගාල්ල දී පැවැත්විණි.

සෞඛ්‍ය සම්පන්න ආහාර සඳහා පාරිභෝගිකයාට ඇති අයිතිය විශේෂයෙන් අවධාරණය කරමින් “සෞඛ්‍ය සම්පන්න ආහාර අපේ අයිතියයි: සෞඛ්‍ය සම්පන්න ආහාර සඳහා පාරිභෝගිකයා බලගැන්වීම” යන කාලීන තේමාව යටතේ මෙවර ජාතික පෝෂණ මාසය ප්‍රකාශයට පත් කර තිබේ.

මෙහිදී අදහස් දක්වමින් සෞඛ්‍ය හා කර්මාන්ත අමාත්‍ය වෛද්‍ය රමේෂ් පතිරණ මහතා කියා සිටියේ, වර්ථමානය වන විට අධිරුධිර පීඩනය , හෘර්ද අකර්ණිය, දියවැඩියා ඇතුළු රෝගී තත්වයන් විශාල ලෙස ඉහළ ගොස් තිබෙන බවත් එය ඉතාම නරක තත්වයක් බවයි. මෙම සැමරුම් උත්සවයේදී අහාර හා රෝගාබාධ පිළිබදවත්, නීති ක්‍රියාත්මක කිරීම පිළිබදවත් අදහස් ඉදිරිපත් වූ බව කී අමාත්‍යවරයා නීති වලින් මෙය පාලනය කිරීමට හැකි කාරණයක් නොවන බවද කීවේය.

සෞඛ්‍ය අමාත්‍යාංශය විසින් ට්‍රැෆික් ලයිට් සිස්ටම් එකක් හඳුන්වා දුන් බවත්, එය යහපත් දෙයක් වන බවත්, නමුත් එය ක්‍රියාත්මක වෙද්දීත් අපේ දියවැඩියාව, අධිරුධිර පීඩනය, හෘර්ද අකරනිය මේ සියල්ලම වැඩි වන බවත්, එයින් පෙනී යන්නේ එහි යම් අඩුවක් තිබෙන බවද පෙන්වා දුන්නේය.

දඩුවම් දී මෙය සකස් කරන්න හැකියැයි සිතනවානම් එය සංකල්පීය වැරැද්දක් බවද එය නිවැරදි කර ගැනීම අවශ්‍ය බවද කී අමාත්‍යවරයා ඒ සඳහා සැමගේම සහය අවශ්‍ය බවත්, විශේෂයෙන්ම මාධ්‍යයේ සහය අවශ්‍ය බවද කීවේය.