මේ දිනවල ළමුන් අතර ඉන්ෆ්ලුවෙන්සා රෝග ලක්ෂණ සහ ඉහළ ශ්වසන මාර්ගයේ වෛරස් උණ රෝග වැඩිවීමේ තත්ත්වයක් පවතින බැවින් ඒ සඳහා විශේෂ අවධානයෙන් කටයුතු කළ යුතු බව කොළඹ රිජ්වේ ආර්යා ළමා රොහලේ ළමා රෝග විශේෂඥ වෛද්‍ය දීපාල් පෙරේරා මහතා පවසයි.
සෙම පරීක්ෂණයක් සිදුකිරීමෙන් ඉන්ෆ්ලුවෙන්සා දැයි පරීක්ෂා කර බැලිය හැකි බව ද හුස්ම ගැනීමේ අපහසුව සහ වමනය යාම දිගටම පවතී නම් ප්‍රති වෛරස් ලබාදීමක් සිදුකරන බව ද ඒ මහතා අවධාරණය කළේය.
මෙම වෛරස් රෝගවල රෝග ලක්ෂණ ලෙස උණ සමග හිසරදය, කැස්ස, සෙම්ප්‍රතිශ්‍යාව, කිවිසුම් යෑම, ඇඟපත රිදීම දක්නට ලැබෙන බව ද එවැනි රෝග ලක්ෂණ පන්තිවල සහ දිවා සුරැකුම් මධ්‍යස්ථානවල හා නිවෙස්වල ඉක්මණින් පැතිරෙනවා නම් මෙය ඉහළ ශ්වසන මාර්ගයේ වෛරස් රෝගයක් හෝ ඉන්ෆ්ලුවෙන්සා විය හැකි බව වෛද්‍යවරයා පවසයි.
මෙය වෛරස් ආසාදනයක් බැවින් ප්‍රතිජීවක අවශ්‍ය නොවන බව ද දිගටම කැස්ස පවතී නම් ළමා හතිය ඇතිවිය හැකි බැවින් ඊට නිසි ප්‍රතිකාර ලබාදෙන ලෙස ද පැවසුවේය. රෝග ලක්ෂණ ඇති අය මුඛ ආවරණ පැළඳීම සිදුකරන ලෙසද, රෝග ලක්ෂණ පවතින දරුවන් නිවෙස්වල තබා ගන්නා ලෙසද සඳහන් කළ ළමා රෝග විශේෂඥ වෛද්‍යවරයා රෝගය වැළඳුණු දරුවන්ට ස්වභාවික දියර ආහාර වැඩි වශයෙන් ලබාදී විවේකය ලබාදෙන ලෙස ද පැරසිටමෝල් නියමිත මාත්‍රාව ලබාදෙන ලෙස ද පැවසුවේය.
පරීක්ෂා කිරීම්වලදී අප රටෙන් ඉන්ෆ්ලුවෙන්සා ඒ සහ බී යන 02ම පොසිටිව් වන අය දැකිය හැකි බවද මෙය සාමාන්‍යයෙන් ශීත රටවල ශීත කාලයට ඇතිවන රෝගයක් බවද පැවසූ විශේෂඥ වෛද්‍ය දීපාල් පෙරේරා මහතා, ඉන්ෆ්ලුවෙන්සා ඒ, බී, සී, ලෙස පවතින බව ද වැඩිදුරටත් පැවසුවේය.
අවුරුදු 02ට අඩු දරුවන්, අවුරුදු 65ට වැඩි වැඩිහිටියන්, නිදන්ගත ශ්වසන රෝග ඇති අය, ප්‍රතිශක්තීකරණය අඩු අය සහ ගර්භණී මාතාවන් ආදීන්ට මෙය තරමක් බරපතල විය හැකි බවද දින 03ක් හෝ 04කට වැඩියෙන් උණ පවතී නම් මේ දිනවල ඩෙංගු රෝගයත් පවතින නිසා රුධිර පරීක්ෂණයක් කරගැනීම සුදුසු බවද සඳහන් කළේය.
