වෘත්තිය සමිති රැසක් ආරම්භ කළ වැඩ වර්ජන

වෘත්තිය සමිති රැසක් ආරම්භ කළ වැඩ වර්ජනය මේ වන විට ක්‍රියාත්මකයි.

තැපැල් වෘත්තීය සමිති සන්ධානයේ කැදවුම්කරු චින්තක බණ්ඩාර මහතා කියා සිටියේ අද මධ්‍යම රාත්‍රියේ සිට තැපැල් සේවකයින් වර්ජනයේ නිරත වන බවයි.

එමෙන්ම සැලසුම් කළ පරිදි අද මධ්‍යම රාත්‍රියේ සිට එක් දින වර්ජනයක් ක්‍රියාත්මක කරන බව දුම්රිය වෘත්තීය සමිති සංවිධානය පවසනවා.

දුම්රිය ඉංජිනේරු සංගමයේ සභාපති කේ.යු.කොන්තසිංහ මහතා කියා සිටියේ ඉල්ලීම් 5 ක් මුල් කරගනිමින් මෙම වර්ජනය ක්‍රියාත්මක වන බවයි.

මේ අතර හෙට දිනයේ දිවයින පුරා සියලුම රජයේ රෝහල්වල සංකේත වැඩවර්ජනයක් ක්‍රියාත්මක බව රජයේ වෛද්‍ය නිලධාරින්ගේ සංගමය පවසනවා.

එහි මාධ්‍ය ප්‍රකාශක වෛද්‍ය චමිල් විජේසිංහ මහතා මේ සම්බන්ධයෙන් අදහස් පළ කළා.

එමෙන්ම විශ්ව විද්‍යාල ඇතුලු ක්ෂේත්‍රවල ද තවදුරටත් වැඩ වර්ජන ක්‍රියාත්මක වනවා.

මේ අතර ගුරුවරුන්ගේ වැඩි කරන ලද වැටුප් වර්ධක වහාම ලබා දෙන ලෙස ඉල්ලමින් සහ ගුරුවරුන්ට රුපියල් 20 000 දීමනාවක් ලබා දෙන ලෙස ඉල්ලා රජයේ පාසල් ගුරුවරුන් හෙට එක්දින වැඩ වර්ජනයක නිරත වීමට නියමිතයි.

සමස්ත ලංකා ගුරු සංගමයේ ලේකම් ජෝෂප් ස්ටාර්ලින් මහතා මේ සම්බන්ධයෙන් අදහස් පළ කළා.

එමෙන්ම ලංකා විදුලිබල මණ්ඩල ඒකාබද්ධ වෘත්තිය සමිති සංවිධානයේ කැදවුම්කරු රංජන් ජයලාල් මහතා පැවසුවේ හෙට විදුලිබල මණ්ඩල සේවකයින් සේවයට වාර්තා නොකරන බවයි.

මේ අතර ආණ්ඩුවේ බදු ප්‍රතිපත්තියට එරෙහිව සිදු කරමින් පවතින වැඩ වර්ජනයට සහයෝගය ලබා දෙන බව ජල සම්පාදන වෘත්තිය සමිති ඒකාබද්ධ සන්ධානය පවසනවා.

ඒ අනුව ජල සැපයුම අඩාල වීමේ අවදානමක් පවතින බවයි එම සන්ධානය පැවසුවේ.

ලංකා බැංකු සේවක සංගමය පැවසුවේ හෙට දිනයේද මෙම වැඩ වර්ජනය ක්‍රියාත්මක බවයි.

රජයේ බදු ප්‍රතිපත්තියට එරෙහිව රේගු නිලධාරින් සහ ශ්‍රී ලංකා වරාය අධිකාරියේ සේවකයින් හෙට දිනය තුළ දැවැන්ත වැඩ වර්ජනයක් සිදු කිරීමට නියමිතයි.