නිවසේ නවතා තිබූ මෝටර් රථයක් තුළ සිර වූ පාසල් සිසුවෙකු මියයාමේ පුවතක් පිළියන්දල ප්‍රදේශයෙන් වාර්තා වනවා.
මෙලෙස ජීවිතක්ෂයට පත්ව ඇත්තේ පිළියන්දල මාම්පේ ජයමාවත ප්‍රදේශයේ පදිංචිව සිටි 17 හැවිරිදි වියෙහි පසුවූ පාසල් සිසුවෙක්.
පොලිස් විමර්ශනවලදී අනාවරණ වී ඇත්තේ එම අවස්ථාවේ නිවසේ කිසිවෙකු සිට නොමැති බවයි.
මියගිය සිසුවාගේ නිවුන් සොහොයුරා සමඟ ඔහුගේ මවද ජයවර්ධනපුර රෝහලට පැමිණ ඇති අතර වැඩිමහල් සොහොයුරා සහ ඔහුගේ පියා රැකියාව වෙත ගොස් තිබෙනවා.
සිසුවාගේ මිතුරෙකු නිවසට පැමිණ ඔහු නොමැති බව දැනගැනීමත් සමඟ ඒ පිළිබඳව දුරකතනයෙන් සිසුවාගේ පියාට දැනුම් දී ඇති අතර පියා කඩිනමින් නිවසට පැමිණ සිදු කරන ලද සොයා ගැනීමේ දී නවතා තිබූ මෝටර් රථය තුළ මෙම සිසුවා සිර වී සිටින බව දැක තිබෙනවා.
ඉන් අනතුරුව කඩිනමින් ඔහු රෝහල් ගත කිරීමට පියවර ගෙන ඇති බවත් එහිදී මෙම පාසල් සිසුවා මියගොස් ඇති බවටත් අනාවරණය වුණා.
අදාළ මියයාම පිළිබඳව රජයේ රස පරීක්ෂකවරයා විසින් මෝටර් රථය පරීක්ෂා කිරීම සිදුකර ඇති බව සඳහන්.
සිද්ධිය පිළිබඳව වැඩිදුර විමර්ශන පොලීසිය මඟින් ක්‍රියාත්මක බවයි අප වාර්තාකරු කියා සිටියේ.
