මිල පහළ යෑමේ වාසිය අපිට නැහැ- ජනතාවගෙන් මැසිවිලි

ගෘහස්ථ ගැස් මිල ඇතුළු අත්‍යවශ්‍ය ආහාර ද්‍රව්‍ය සහ ඖෂධ වර්ග රැසක මිල අඩු කලද එම අඩු කල මිලට සාපෙක්ෂව පාරිභෝගිකයන්ට එහි වාසිය ව්‍යාපාරිකයන් විසින් ලබානොදෙන බව හැටන් ප්‍රදේශයේ ජනතාව පවසනවා.

කිලෝ 12.5 ගෘහස්ථ ගැස් සිලින්ඩරයක මිල අඩු කලද , හැටන් ඇතුළු වතුකරයේ ප්‍රධාන නගරවල පිහිටි ආපනශාලාවල අලෙවි කරන පිසු ආහාර වල මිල අඩු කර නොමැති බවයි ඔවුන් පවසන්නේ.

වතුකරයේ ජනතාව වැඩි දුරටත් ප‍ෙන්වා දෙන්නේ රජය විසින් ආහාර සහ ඖෂධ මිල ගණන් අඩු කර ඇතත් එහි වාසිය ව්‍යාපාරිකයන් ජනතාවට ලබා නොදෙන බවයි .

නව මිලට ලිට්‍රෝ ගැස් අලෙවි නියෝජිතයන්ට බෙදා හැරිම එම සමාගම විසින් අද දින උදැසන සිදු කල අතර , ආපනශාලා පවත්වාගෙන යාමේදි වැඩි වු විදුලි බිලට සාපෙක්ෂව සහ සේවක වැටුප් හමුවේ තම ආපනශාලා වල පිසින ලද ආහාර ද්‍රව්‍ය අඩු මිලට පාරිභෝගිකයන් ලබාදිමට නොහැකි තත්ත්වයක් උද්ගත වි ඇති බව හැටන් ප්‍රදේශයේ ආපනශාලා හිමියන් පවසනවා.

ගැස් මිල අඩු විමෙන් පමණක් පිසු ආහාර අඩුමිලට පාරිභෝගිකයන්ට ලබාදිය නොහැකි වි ඇත්තේ ආහාර පිසිම සදහා මිල දි ගන්නා අමුද්‍රව්‍ය තමන්ට අඩු මුදලට නොලැබෙන නිසා බවයි හැටන් ප්‍රදේශයේ ආපනශාලා හිමියන් තව දුරටත් කියා සිටියේ.