මෙවර පළාත් පාලන මැතිවරණයට ඉදිරිපත් වී ඇති අපේක්ෂකයින් සම්බන්ධයෙන් මැතිවරණ කොමිෂන් සභාව නිවේදනයක් නිකුත් කර තිබෙනවා.
එහි සඳහන් වන්නේ මාර්තු 09 වන දා පැවැත්වෙන මැතිවරණය සඳහා අපේක්ෂකයින් අසූ දහස් හත්සිය විසි දෙනෙකු ඉදිරිපත් වී ඇති බවයි.
ලියාපදිංචි දේශපාලන පක්ෂ 80කින් සහ ස්වාධීන කණ්ඩායම් 329කින් ඔවුන් ඉදිරිපත් වී ඇති බවයි මැතිවරණ කොමිෂන් සභාව කියා සිටියේ.
මේ අතර පළාත් පාලන කොමසාරිස්වරුන් සහ සහකාර කොමසාරිස්වරුන් සහභාගි වන රැස්වීමක් රාජගිරිය මැතිවරණ කොමිෂන් සභාවේදී අද පැවැත් වුණා.
පළාත් පාලන ආයතන ඡන්ද විමසීම පැවැත්වෙන කාල සීමාව තුළ රාජ්‍ය සම්පත් අවභාවිතය වැළැක්වීමට සහ අදාළ ආයතන කටයුතු කළ යුතු ආකාරය පිළිබඳවද එහිදි සාකච්ඡා වූ බවයි වාර්තා වන්නේ.
එම කරුණු සම්බන්ධයෙන් සාකච්ඡා කිරීමට රාජ්‍ය දෙපාර්තමේන්තු සහ ව්‍යවස්ථාපිත මණ්ඩල රාජ්‍ය සම්පත් භාර නිලධාරීවරුන්ද මැතිවරණ කොමිෂන් සභාව වෙත අද දින කැඳවනු ලැබුවා.
මේ අතර පළාත් පාලන මැතිවරණයට අදාළ ඉදිරි කටයුතු සම්බන්ධයෙන් මැතිවරණ කොමිසම සහ මාධ්‍ය ආයතන ප්‍රධානීන් අතර ද සාකච්ඡාවක් පැවැත්වීමට නියමිතව ඇති බව සඳහන්.
