මල්වතු – අස්ගිරි මහනාහිමිවරුන්ගෙන් ජනපතිට ලිපියක්

මල්වතු හා අස්ගිරි මහ නාහිමිවරුන් විසින් ජනාධිපති රනිල් වික්‍රමසිංහ මහතා වෙත ලිපියක් යොමුකර තිබෙනවා.

අදාළ ලිපියෙන් ඉල්ලා ඇත්තේ ඉහළ යන ජීවන වියදම පහත හෙළා මහජන පීඩාවන් අවම කර, සමාජ නොසන්සුන්තාව සමනය කිරීමට නිසි ප්‍රතිපත්තිමය යාන්ත්‍රණයක් සකස් කරන ලෙසයි .

රටේ උද්ගතව තිබූ ආර්ථික, දේශපාලන සහ සමාජ අස්ථාවරත්වය යම් පමණකට සමනය කොට ස්ථාවරත්වයක් ඇති කිරිමට වත්මන් ජනාධිපතිවරයා ගත් ක්‍රියාමාර්ග පිළිබඳ ප්‍රසාදය පළ කරන බවද එම ලිපියේ වැඩි දුරටත් සදහන්.

ආර්ථික සංකෝචනය, අධි උද්ධමනය, අධික විදුලි ගාස්තු, ජල ගාස්තු, අත්‍යවශ්‍ය ආහාර ද්‍රව්‍ය මිල ඉහළ යාම ඇතුලු කරුණු හේතුවෙන් ජන ජීවිතය අඩාලවීම සමඟ උද්ගතව ඇති සමාජ පීඩනය පිළිබඳවද එහිදී මහනාහිමිවරුන් සිහිපත් කර තිබෙනවා.

මෙම තත්වයට මුහුණදීමට රජය වහාම ජනතා හිතවාදී ප්‍රතිපත්තීන් ක්‍රියාත්මක කිරීම සඳහා කටයුතු කළ යුතු බවයි මහ නාහිමිවරුන් අවධාරණය කරන්නේ.

රජයේ වගකීම පළාත් පාලන මැතිවරණය නියමිත පරිදි පැවැත්වීම බවද මෙම ලිපියෙන් සිහිපත් කර තිබෙනවා.