මත්ද්‍රව්‍ය සමග අත්අඩංගුවට ගත් ධීවරයින් රඳවා ප්‍රශ්න කිරීමට අවසර

මත්ද්‍රව්‍ය කිලෝ ග්‍රෑම් 263 ක් සමග අත්අඩංගුවට පත් දෙවුන්දර ධීවරයින් 10 දෙනා ලබන 22 දින දක්වා රඳවා ප්‍රශ්න කිරීමට කොළඹ අතිරේක මහේස්ත්‍රාත් මංජුල රත්නායක මහතා නියෝග කර තිබෙනවා.

සැකකරුවන් අධිකරණයට ඉදිරිපත් කරමින් මත්ද්‍රව්‍ය කාර්යාංශය කළ ඉල්ලීමක් සලකා බැලීමෙන් පසුවයි මහේස්ත්‍රාත්වරයා මෙම නියෝගය නිකුත් කර ඇත්තේ.

අයිස් මත්ද්‍රව්‍ය කිලෝ ග්‍රෑම් 179.906ක් සහ හෙරොයින් කිලෝග්‍රෑම් 83.582ක් සමඟ දෙවුන්දර වෙරලේ සිට කිලෝමීටර් 246 ක් ඈත මුහුදේදී මෙම ධිවරයින් අත්අඩංගුවට ගෙන තිබුනා.
ඒවායෙහි වටිනාකම රුපියල් කෝටි 380 කට අධික බවයි ගණන් බලා තිබුනේ.
ඒ අනුව මත්ද්‍රව්‍ය ජාවාරම් කිරීම, සන්තකයේ තබා ගැනීම ඇතුළු චෝදනා යටතේ සැකකරුවන් අධිකරණයට ඉදිරිපත් කළ අතර මත්ද්‍රව්‍ය ජාවාරම් ජාලය අනාවරණය කරගැනීම සඳහා තවදුරටත් විමර්ශන සිදුකරන බැවින් සැකකරුවන් රඳවා ප්‍රශ්න කිරීමට අවසර ලබා දෙන ලෙස පොලිසිය කළ ඉල්ලීම අනුව මෙම නියෝග නිකුත් කෙරුනා.