පේරාදෙණිය සරසවියේ මහා ශිෂ්‍ය සංගමයේ සභාපති ඇතුළු 14 දෙනාට ඇප

අත්අඩංගුවට ගෙන රක්ෂිත බන්ධනාගාර ගත කර සිටි පේරාදෙණිය විශ්වවිද්‍යාලයේ ශිෂ්‍ය සංගමයේ සභාපති වරයා ඇතුලු සැකකරුවන් 14 දෙනා ඇප මත නිදහස් කර තිබෙනවා.

පේරාදෙණිය විශ්වවිද්‍යාලයේ හිටපු උපකුලපති මහාචාර්ය අතුල සේනාරත්න මහතාගේ නිවසට පහරදීමේ සිද්ධිය සම්බන්ධයෙන් පසුගියදා පොලිසිය විසින් අත්අඩංගුවට ගෙන ඔවුන් රක්ෂිත බන්ධනාගාර ගත කර සිටියා.

සිද්ධියට අදාළ නඩුව අද(01) මහනුවර මහේස්ත්‍රාත් අධිකරණයේ කැඳවූ අවස්ථාවේදී මහේස්ත්‍රාත්වරයා මෙම නියෝගය කර තිබෙනවා.

සැකකරුවන් 14 දෙනා රුපියල් 15000ක් බැගින් වූ මුදල් ඇප හා රුපියල් ලක්ෂ පහ බැගින් ශරීර ඇප දෙකක් මත මුදාහරින ලද අතර ග්‍රාම නිලධාරී සහතික ඉදිරිපත් කළ යුතු බවටද මහේස්ත්‍රාත්වරයා නියෝග කර තිබෙනවා.

මහා ශිෂ්‍ය සංගමයේ සභාපති චමෝද් සත්සර සෑම මසකම පළමු හා තෙවන සතිවල ඉරුදින උදේ 9ත් 12ත් අතරත් හිටපු සභාපති අනුරාධ විදානගේ සෑම මසකම අවසන් සතියේ ඉරුදින උදේ වරුවේත් කොළඹ අපරාධ පරීක්ෂණ දෙපාර්තමේන්තුවේ විශේෂ අපරාධ අපරාධ අංශයේ පෙනී සිටිය යුතු බවටද මහේස්ත්‍රාත්වරයා නියෝග කර සිටියා.

අනෙක් සැකකරුවන් 12 දෙනා සෑම මසකම අවසන් සතියේ උදේ වරුවේදී පේරාදෙණිය පොලිස් ස්ථානයේ පෙනී සිටිය යුතු බවටත් මහේස්ත්‍රාත්වරයා නියෝග කළා.

සැකකරුවන් 14 දෙනාගේ විදෙස් ගමන් තහනම් කිරීමතේ මෙම නඩුවට අදාළව මේ වන විට සාක්ෂි ලබාදී ඇති පැමිණිල්ලේ සාක්ෂිකරුවන්ට හා ඉදිරියට සාක්ෂි ලබාගැනීමට නියමිත ශිෂ්‍යයින්ට සෘජුව හෝ වක්‍රව කිසිදු බලපෑමක් නොකළ යුතු බවටත් වූ කොන්දේසි මත නිදහස් කර තිබෙනවා.

මෙම නඩුව යළි මාර්තු මස 15 වනදා කැඳවීමට නියමිතයි.