පළාත් පාලන මැතිවරණය කල්දැමීම සම්බන්ධයෙන් දෙදින විවාදයක් පැවැත්වීමට පාර්ලිමේන්තු කටයුතු පිළිබඳ කාරක සභාව අද(01) තීරණය කර තිබෙනවා.
ඒ අනුව මාර්තු මස 9 සහ 10 යන දෙදින එම විවාදය පැවැත්වීමට නියමිතයි.
දෙදින විවාදයක් ලබාදෙන ලෙස විපක්ෂ නායක සජිත් ප්‍රේමදාස මහතා පාර්ලිමේන්තු කටයුතු පිළිබඳ කාරක සභාවේදී ඉල්ලා සිටියා.
එහිදී විපක්ෂනායකවරයා කියා සිටියේ පළාත් පාලන මැතිවරණය කල්දැමීම සම්බන්ධයෙන් රටේ දැඩි විරෝධයක් පැනනැගී ඇති බවයි.
ඒ අනුව ඒ සම්බන්ධයෙන් පුළුල් සාකච්ඡාවක් ඇති වීම වැදගත් බවද ඔහු එහිදී කියා සිටියා.
මෙම විවාදය සභාව කල්තබන අවස්ථාවේ විවාදයක් ලෙසින් පැවැත්වෙනු ඇති.
කතානායක මහින්ද යාපා අබේවර්ධන මහතාගේ ප්‍රධානත්වයෙන් පාර්ලිමේන්තු කටයුතු පිළිබඳ කාරක සභාව පාර්ලිමේන්තු සංකීර්ණයේදී අද(01) පස්වරුවේ පැවත්වුණා.
