නිවසේ ආරක්ෂාකයාගේ පහරින් ගෙහිමියා මරුට

කටුගස්තොටල මැණික්කුඹුර අඩිපාර ප්‍රදේශයේදී පුද්ගල ඝාතනයක් සිදුව තිබෙනවා.

පොලිසිය කියා සිටියේ අද16 උදෑසන මැණික්කුඹුර අඩිපාර ප්‍රදේශයේදී පුද්ගලයෙකුට තියුණු ආයුධයකින් පහරදී ඝාතනය කර ඇති බවයි.

මෙලෙස ඝාතනයට ලක්ව ඇත්තේ වයස අවුරුදු 56ක් පමණ වූ මැණික්කුඹුර අඩිපාර ප්‍රදේශයේම පදිංචිකරුවෙක්.

ඝාතනයට ලක්වූ පුද්ගලයාගේ බිරිඳ විදේශගතව සිටින බවත් මියගිය පුද්ගලයා නිවසේ තනිවම සිට ඇති බවත් පොලිසිය පවසනවා.

අදාළ නිවසේ ආරක්ෂාරව පිණිස යොදවා සිටි පුද්ගලික ආරක්ෂක සේවයකට අයත් ආරක්ෂකයෙකු විසින් තියුණු ආයුධයකින් පහරදීමෙන් මෙම ගාතනය සිදු කර ඇති බවයි මූලික පොලිස් විමර්ශනවලින් අනාවරණ වී ඇත්තේ.

පහර කෑ පුද්ගලයා එම සිදුවීම වූ ස්ථානයේදීම මරණයට පත්ව ඇති අතර ඝාතනයට හේතුව මෙතෙක් අනාවරණ වී නැහැ.

සිද්ධිය සම්බන්ධයෙන් 33 හැවිරිදි පේරාදෙණිය මුරුතලාව ප්‍රදේශයේ පදිංචි සැකකරු අත්අඩංගුවට ගෙන ඇති අතර පහරදීමට උපයෝගී කර ගත් තියුණු ආයුධයද පොලිස් භාරයට ගෙන තිබෙනවා.

මෘත දේහය මහේස්ත්‍රාත් පරීක්ෂණය සඳහා සිද්ධිය වූ ස්ථානයේම පොලිස් ආරක්ෂාව යටතේ ඇති අතර ඝාතනය සම්බන්ධයෙන් වැඩිදුර විමර්ශන කටුගස්තොට පොලිසිය විසින් සිදු කරනු ලබනවා.