ධනිෂ්කට පනවා තිබූ තහනම ඉවත් කිරීම ගැන සලකා බලනවා

ශ්‍රී ලංකා ක්‍රිකට් ආයතනය විසින් ධනිෂ්ක ගුණතිලකට පනවා තිබූ තහනම ඉවත් කිරීම සම්බන්ධයෙන් සලකා බලන බව ක්‍රීඩා අමාත්‍ය රොෂාන් රණසිංහ මහතා පවසනවා.

ඕස්ට්‍රේලියාවේදී ලිංගික අතවර චෝදනාවලට අදාළ නඩුවෙන් ධනිෂ්ක ගුණතිලක අද නිදොස් කොට නිදහස් කරනු ලැබුවා.

ඒ අනුවයි ශ්‍රී ලංකා ක්‍රිකට් ආයතනය ඔහුට පනවා තිබු තහනම පිලිබඳ සලකා බැලීමට තිරණය කර ඇත්තේ.

ධනිෂ්ක ගුණතිලකට එරෙහි නඩුව පසුගිය 18 වැනිදා සිට අඛණ්ඩව දින 4 ක කාලයක් සිඩ්නි නුවර පිහිටි ඩව්නිං සෙන්ටර් අධිකරණයේදී විභාගයට ගනු ලැබුවා.

තම සේවාදායකයා කිසිදු අයුරකින් අනාරක්ෂිත ලෙස ලිංගික කටයුතුවල නිරත නොවු බවයි එහිදි ධනිෂ්ක වෙනුවෙන් පෙනී සිටි නීතිඥවරයා කරුණු දක්වමින් සදහන් කර තිබුණේ.

විනිසුරු සාරා හගේට් මෙම නඩුවේ තීන්දුව ප්‍රකාශයට පත් කරමින් සඳහන් කළේ පැමිණිලිකාර කාන්තාව සිය ප්‍රකාශවලින් පරස්පර කරුණු දක්වා ඇති බවයි.

අවසානයේ මෙම නඩුවේ තීන්දුව ප්‍රකාශයට පත් කරමින් සාරා හගේට් ධනිෂ්ක ගුණතිලකට එල්ල වූ සියලු චෝදනාවලින් නිදොස් කර නිදහස් කරනු ලැබුවා.