උසස් පෙළ විභාගය පැවැත්වෙන කාල සීමාව තුල අඛණ්ඩව විදුලි සැපයුම ලබා දෙන්නයි කල විධානය පිලිපැදීමට විදුලි බල මණ්ඩලය අපොහොසත් වන්නේ නම් නීතිමය ක්‍රියාමාර්ග ගැනීමට කටයුතු කරන බව මහජන උපයෝගිතා කොමිසම – මානව හිමිකම් කොමිෂන් සභාව වෙත ලිඛිතව දැනුම් දී තිබෙනවා.
මහජන උපයෝගිතා කොමිසමේ සභාපති ජනක රත්නායක මහතා එමගින් දක්වා ඇත්තේ ඒ පිලිබඳ ශ්‍රී ලංකා විදුලි බලපනතේ (සංශෝධිත) 48 වන වගන්තිය මගින් ප්‍රතිපාදන ලබා දී ඇති බවයි.
මානව හිමිකම් කොමිෂන් සභාව විසින් පසුගිය බදාදා දින විධානයක් ලෙස නිකුත් කරනු ලැබූ සමථයට අනුකුලව – ඊයේ දින සිට ලබන මස 17 දින දක්වා සිදුකිරීමට සැලසුම් කරන කිසිදු විදුලි කප්පාදුවක් ශ්‍රී ලංකා මහජන උපයෝගීතා කොමිෂන් සභාව විසින් අනුමත නොකරනු ඇති බවත් එබැවින් එම කාලසීමාව තුල අඛණ්ඩ විදුලි සැපයුමක් පවත්වාගෙන යෑමට කටයුතු කරන ලෙසත් සම්ප්‍රේෂණ බලපත්‍රලාභියා වන විදුලි බල මණ්ඩලයට මහජන උපයෝගිතා කොමිසම ද විධානයක් ලබා දී තිබෙනවා.
