ශ්‍රී ලංකාව ආසියානු කුසලානයේ සුපිරි 4 දෙනාගේ වටයට

ආසියානු කුසලාන එක්දින ක්‍රිකට් තරගාවලියේ ඊයේ පැවති තරගයෙන් ඇෆ්ගනිස්ථාන කණ්ඩායම පරාජය කරමින් ලකුණු 2ක තියුණු ජයක් වාර්තා කිරීමට ශ්‍රී ලංකා කණ්ඩායම සමත් වුණා.

ඒ අනුව මෙම ජයත් සමග ශ්‍රී ලංකා කණ්ඩායම සුපිරි 4 දෙනාගේ වයට සුදුසුකම් ලැබීමටයි සමත් වුණේ.

පාකිස්ථානයේ ලාහෝර් හීදී පැවති මෙම තරගයේ පළමුවෙන් පන්දුවට පහරදුන් ශ්‍රී ලංකා කණ්ඩායම නියමිත පන්දුවාර 50 අවසානයේ කඩුළු 08ක් දැවී රැස් කළ ලකුණු සංඛ්‍යාව 291ක්.

එහිදී අගනා ඉනිමක් ක්‍රීඩා කළ කුසල් මෙන්ඩිස් ලකුණු 92ක් රැස් කිරීමට සමත් වුණා.

පන්දු යැවීමේදී ගුල්බදීන් නයිබ් ලකුණු 60ට කඩුළු 4ක් බිඳ හෙලනු ලැබුවා.

ඒ අනුව තරගාවලියේ සුපිරි 4 දෙනාගේ වටයට සුදුසුකම් ලබා ගැනීමටනම් ඇෆ්ඝනිස්තාන කණ්ඩායමට මෙම තරගයේ ජය පමණක් ප්‍රමාණවත් නොවූ අතර, ඒ සදහා ඔවුන් ලකුණු 292 ක ඉලක්කය පන්දුවාර 37යි එක් පන්දුවක් තුළ හඹා යාම අවශ්‍ය වුණා.

කෙසේ වෙතත් ඇෆ්ගනිස්ථාන කණ්ඩායමට පන්දුවාර 37යි පන්දු 4ක් අවසානයේ සියල්ලන් දැවී රැස් කර ගත හැකි වූයේ ලකුණු 289ක් පමණයි.

එහිදී මොහොමඩ් නබී ලකුණු 65ක් රැස් කිරීමට සමත් වුණා.
පන්දු යැවීමේදී කසුන් රාජිත ලකුණු 79ට කඩුළු 4ක්, ධනන්ජය ද සිල්වා ලකුණු 12ට කඩුළු 2ක් සහ දුනිත් වෙල්ලාලගේ ලකුණු 36ට කඩුළු 2ක් බිඳ හෙළීමට සමත් වුණා.