ආසියානු කුසලානයේ නිල තරග සැලසුම් එළියට

ආසියානු කුසලසාන පන්දුවාර පනහ ක්‍රිකට් තරගාවලියේ නිල තරග සැලසුම ප්‍රකාශයට පත් කර තිබෙනවා.

තරග 13කින් සමන්විත මෙවර තරගාවලියේ සත්කාරකත්වය දරනු ලබන්නේ පාකිස්තානයයි.

එහෙත් සත්කාරකත්වය හිමි පාකිස්තානයේ තරග හතරක් පමණක් පැවැත්වෙන අතර සෙසු තරග 9ම පැවැත්වෙන්නේ ශ්‍රී ලංකාවේ කොළඹදී සහ පල්ලෙකැලේදියි.

තරගාවලිය අගෝස්තු මස 30 වනදා සිට ආරම්භ වීමට නියමිතයි.

මෙවර තරගාවලියේ කණ්ඩායම් හයක් තරග වදින අතර එම කණ්ඩායම් හය කාණ්ඩ දෙකක් යටතේ තරග වදිනවා.

ඒ අනුව මූලික වටයේදී A සහ B යනුවෙන් කාණ්ඩ දෙකකට බෙදා ඇති අතර එක් කාණ්ඩයකට කණ්ඩායම් තුනක් ඇතුළත්.

ඒ අනුව A කාණ්ඩය යටතේ ඉන්දියාව, පාකිස්තානය සහ නේපාලය ක්‍රිඩා කිරීමට නියමිත අතර ශ්‍රී ලංකා කණ්ඩායම B කාණ්ඩය යටතේ බංග්ලාදේශය සහ ඇෆ්ගනිස්ථානය සමග තරග වැදීමට නියමිතයි.

එක් කණ්ඩායමකට ඒ අනුව තරග  දෙක බැගින් හිමිවන අතර එක් එක් කාණ්ඩයේ මුල් ස්ථාන දෙක හිමි කර ගන්නා කණ්ඩායම් හතර  සුපිරි හතර වටයට සුදුසුකම් ලබාගැනෙනු ඇති.

සුපිරි හතර වටයේදී සෑම කණ්ඩායමක්ම සෙසු කණ්ඩායම් තුන සමගින් තරගය බැගින් ක්‍රීඩා කිරීමට නියමිත අතර ඒ අනුව සුපිරි හතර වටයේ මුල් ස්තාන දෙක හිමි කර ගන්නා කණ්ඩායම් දෙක අවසාන මහා තරගයට සුදුසුකම් ලබනවා.

සුපිරි හතර වටයේ තරග හයෙන් පහක් ශ්‍රී ලංකාවේදී පැවැත්වීම විශේෂත්වයක්.

තරගාවලියේ අවසන් මහා තරගය එළැඹෙන සැප්තැම්බර් 17 වනදා කොළඹ ආර්. ප්‍රේමදාස ක්‍රීඩාංගණයේදී පැවැත්වීමට නියමිතයි.

ඒ අනුව තරගාවලියේ පළමු තරගය අගෝස්තු මස 30 වනදා පාකිස්තානය සහ නේපාලය අතර පැවැත්වෙන්නේ පාකිස්තානයේ මුල්තාන්හිදියි.

දෙවන තරගය අගෝස්තු 31 වනදා පැවැත්වෙන්නේ ශ්‍රී ලංකාවේ මහනුවර පල්ලෙකැලේ ක්‍රීඩාංගණයේදීයි.

ඒ බංග්ලාදේශ කණ්ඩායම සහ ශ්‍රී ලංකා කණ්ඩායම අතරයි.

තෙවන තරගය සැප්තැම්බර් මස 2 වනදා පාකිස්තානය සහ ඉන්දියාව අතර පැවැත්වෙන්නේද මහනුවර පල්ලෙකැලේ ක්‍රීඩාංගණයේදීයි.

මේ අතර සිව්වන තරගය සැප්තැම්බර් 3 වනදා බංග්ලාදේශය සහ ඇෆ්ගනිස්ථානය අතර පැවැත්වෙන්නේ පාකිස්තානයේ ලාහෝර් හිදියි.

සැප්තැම්බර් 4 වනදා තරගාවලියේ පස්වන තරගය පැවැත්වෙන්නේ ඉන්දියාව සහ නේපාලය අතරයි.

එම තරගයද මහනුවර පල්ලෙකැලේ ක්‍රීඩාංගනයේදී පැවැත්වීමටයි කටයුතු යොදා ඇත්තේ.

පළමු වටයේ අවසන් තරගය ශ්‍රී ලංකාව සහ ඇෆ්ගනිස්ථානය අතර පැවැත්වෙන අතර එම තරගය සැප්තැම්බර් 5 වනදා පාකිස්ථානයේ ලාහෝර් හිදී පැවැත්වීමට නියමිතයි.

මේ අතර සුපිරි හතර වටයේ පළමු තරගය සැප්තැම්බර් 6 වනදා පාකිස්ථානයේ ලාහෝර්හිදී පැවැත්වීමට කටයුතු යොදා තිබෙනවා.

සුපිරි හතර වටයේ සෙසු තරග පහ කොළඹ ආර්. ප්‍රේමදාස ක්‍රීඩාංගණයේදී පැවැත්වීමටයි කටයුතු යොදා ඇත්තේ.

ඒ සැප්තැම්බර් 9, 10, 12, 14 සහ 15 යන දිනයන්හිදීයි.

තරගාවලියේ අවසන් තරගය සැප්තැම්බර් මස 17 වනදා කොළඹ ආර්. ප්‍රේමදාස ක්‍රීඩාංගණයේදී පැවැත්වීමට කටයුතු යොදා තිබෙනවා.