අනතුරකට ලක්වූ චාමික කරුණාරත්න සැත්කමට ලක් කරයි

අනතුරකට ලක්වූ ශ්‍රී ලංකා සුපිරි ක්‍රීඩක චාමික කරුණාරත්න මේ වන විට සැත්කමට ලක් කර ඇති බවට තොරතුරු වාර්තා වනවා.

එමෙන්ම වැඩිදුරටත් තොරතුරු වාර්තා වන්නේ පන්දුව මුහුණේ ගැටීමෙන් ඔහුගේ මුඛයේ දත් හතරකට හානි සිදුව ඇති බවයි.

අනතුරට ලක්වීමෙන් අනතුරුව චාමික කරුණාරත්න කඩිනමින් ගාල්ල පෞද්ගලික රෝහලක් වෙත ඇතුළත් කිරීමට පියවර ගෙන තිබෙනවා.

එල්.පි.එල් තරගාවලියේ ගෝල් කණ්ඩායමට එරෙහිව ඊයේ පැවති තරගය අතරතුරදී උඩපන්දුවක් රැක ගැනීමට යාමේදී චාමික කරුණාරත්න එලෙස අනතුරට ලක්ව තිබුණා.

මේ අතර 2022 ලංකා ප්‍රිමියර් ලීග් ක්‍රිකට් තරගාවලියේ ඊයේ පැවැති තරගය කඩුලු 05 කින් ජය ගැනීමට කැන්ඩි ෆැල්කන්ස් කණ්ඩායම සමත් වුණා.

ඒ, ගෝල් ග්ලැඩියේටර්ස් කණ්ඩායම පරාජයට පත් කරමින්.

තරගයේ කාසියේ වාසිය දිනා ගැනීමට ගෝල් ග්ලැඩියේටර්ස් කණ්ඩායම සමත්වූ අතර ඔවුන් තීරණය කළේ පළමුවෙන් පන්දුවට පහරදිමටයි.

මේ අනුව ප්‍රථමයෙන් පන්දුවට පහරදුන් ගෝල් ග්ලැඩියේටර්ස් කණ්ඩායම කඩුලු 08 ක් දැවී ලකුණු 121 ක් රැස් කළා.

ගෝල් කණ්ඩායම වෙනුවෙන් මොවින් සුබසිංහ ලකුණු 40 ක් රැස්කළ අතර ඉමාඩ් වසම් ලකුණු 34 ක් රැස් කර ගත්තා.

පන්දු යැවීමේදී කාලෝස් බ්‍රාත් වයිට් කඩුලු 04 ක් දවා ගැනීමට සමත් වුණා. සහුර් කාන් කඩුලු 02 ක් දවා ගනු ලැබුවා.

ජයග්‍රහණය සඳහා අවශ්‍යව තිබූ ලකුණු 122, පන්දු වාර 15 කදී ලබා ගැනීමට කැන්ඩි ෆැල්කන්ස් කණ්ඩායම සමත් වු අතර එහිදී ඔවුන්ගේ කඩුලු 05 ක් දැවී ගියා.