සිවිල් පුරවැසියන්ට ලබා දී ඇති සියලු ගිනිඅවි එකතු කරයි

ජීවිත ආරක්ෂාව සඳහා සිවිල් පුද්ගලයින්ට ලබාදී ඇති සියලුම වර්ගයේ ගිනි අවි සහ පතරොම් තාවකාලිකව රජයට භාර ගැනීමට තීරණය කර තිබෙනවා.

ආරක්ෂක අමාත්‍යාංශය නිවේදනය කළේ සමාලෝචනය කිරීමෙන් පසුව නැවත ලබාදීම සලකා බැලීමට යටත්ව මේ පියවර ගෙන ඇති බවයි.

ගිනි අවි සහ ඒ සඳහා නිකුත් කර ඇති පතරොම් නොවැම්බර් 07 වන දිනට පෙර ශ්‍රී ලංකා නාවික හමුදාවේ වැලිසර පිහිටි රජයේ වානිජ පුපුරණ ද්‍රව්‍ය ගබඩාව වෙත භාර දෙන ලෙස සියලුම බලපත්‍රලාභීන්ට දැනුම්දී ඇති බවයි ආරක්ෂක අමාත්‍යාංශය සඳහන් කළේ.

එලෙස භාරදීමෙන් පසුව නිකුත් කරන භාරගැනීමේ කුවිතාන්සියේ පිටපතක් ආරක්ෂක අමාත්‍යාංශයේ ප්‍රධාන ගේට්ටුව අසළ ස්ථාපිත කර ඇති සිවිල් ආරක්ෂක හා සංවර්ධන අංශයේ ලිපි භාරගැනීමේ කවුලුවට භාර දිය යුතුවනවා.

අදාළ දිනට පෙර ගිනි අවි භාරදීමට අපොහොසත් වුවහොත් තුවක්කු ආඥා පනත යටතේ නීතිමය ක්‍රියාමාර්ග ගැනීමට සිදුවන බව ආරක්ෂක අමාත්‍යාංශය දැනුම්දී තිබෙනවා.

ආරක්ෂක අමාත්‍යාංශය නිවේදනය කළේ දේපල ආරක්ෂාව, වගා හානි ආරක්ෂාව හා ක්‍රීඩා කටයුතු සදහා ආරක්ෂක අමාත්‍යාංශය මගින් නිකුත්කර ඇති ගිනි අවි සඳහා මෙය අදාළ නොවන බවයි.