ශ්‍රී ලංකාවට ලෝකඩ පදක්කම් 2 ක්

තායිලන්තයේ පැවැත්වෙන ආසියානු මලල ක්‍රීඩා තරගාවලියේ පළමු දිනය වූ අද පැවති තරගවලින් ශ්‍රී ලංකාව වෙනුවෙන් ලෝකඩ පදක්කම් 2 ක් ජයග්‍රහණය කිරීමට නදීෂා ලේකම්ගේ සහ ගයන්තිකා අබේරත්න සමත් වුණා.

මීටර 1500 කාන්තා ධාවන ඉසව්වේදී ගයන්තිකා අබේරත්න විනාඩි 4 යි තත්පර 14 යි දශම 3 යි 9 ක කාලයක් වාර්තා කරගනිමිනුයි මෙම පදක්කම් හිමි කර ගනු ලැබුවේ.

එහි රන් සහ රිදී පදක්කම් හිමි වුණේ ජපානයටයි.

එමෙන්ම හෙල්ල විසි කිරීමේ කාන්තා ඉසව්වේදි නදීෂා ලේකම්ගේ මීටර 60 යි දශම 9 යි 3 ක දක්ෂතාවයක් දක්වමින් එම ඉසව්වේ ලෝකඩ පදක්කම හිමි කර ගැනීමට සමත් වුණා.

ඇය දැක් වූ මෙම දක්ෂතාවය ශ්‍රී ලංකා වාර්තාවක් ද වනවා.

මේ අතර මීටර 400 පිරිමි ධාවන ඉසව්වේ අවසන් පූර්ව වටයට තරග කළ ශ්‍රී ලංකාවේ අරුණ දර්ශන සහ රාජිත රාජකරුණා හෙට දිනයේ පැවැත්වෙන අවසන් තරගය සදහා අද සුදුසුකම් ලබා ගත්තා.