කොළඹ අධ්‍යාපන කලාපයේ සියලුම පාසල් අද දිනයේ වසා තැබෙන බව බස්නාහිර පළාත් අධ්‍යාපන අධ්‍යක්ෂවරයා පවසනවා.
පවතින අයහපත් කාලගුණ තත්ත්වය හේතුවෙන් දකුණු පළාතේද පාසල් කිහිපයක් අද දින වසා තැබීමට තීරණය කර තිබෙනවා.
දකුණු පළාත් ආණ්ඩුකාරවරයාගේ උපදෙස් පරිදි මෙම තීරණය ක්‍රියාත්ම කරන බවයි දකුණු පළාත් ආණ්ඩුකාරවර මාධ්‍ය ඒකකය පවසන්නේ.
ඒ අනුව අම්බලන්ගොඩ අධ්‍යාපන කලාපයේ පාසල් 5ක් සහ ගාල්ල අධ්‍යාපන කලාපයේ එක් පාසලක් අද වසා තැබෙනු ඇති
එමෙන්ම දිවයිනේ සෙසු පාසල් පැවැත්වීම සම්බන්ධයෙන්ද අධ්‍යාපන අමාත්‍යාංශය විසින් නිවේදනයක් නිකුත් කිරීමටයි පියවර ගෙන ඇත්තේ.
එම නිවේදනයේ දැක්වෙන්නේ පාසල්වලට නිවාඩු ලබාදීමේ දී පළාත් ප්‍රධාන ලේකම්, පළාත් අධ්‍යාපන ලේකම් හෝ පළාත් අධ්‍යාපන අධ්‍යක්ෂ විසින් සුදුසු පරිදි අවශ්‍ය පියවර ගන්නා ලෙස අධ්‍යාපන අමාත්‍යාංශය උපදෙස් දී ඇති බවයි.
මේ අතර දිවයිනට බලපා ඇති අයහපත් කාලගුණ තත්ත්වය හමුවේ මේ වන විට දිස්ත්‍රික්ක 16 ක පවුල් 40,516 ක් පිඩාවට පත්ව තිබෙනවා.
ඒ අනුව පුද්ගලයින් එක් ලක්ෂ පනස් අට දහස් 391 දෙනෙකු පීඩාවට පත්ව ඇති බවයි ආපදා කළමනාකරණ මධ්‍යස්ථානය සදහන් කලේ.
ආපදාවට ලක්වූවන් ආරක්ෂිත ස්ථාන 79 ක රදවා සිටින බවද එම මධ්‍යස්ථානය පැවසුවා.
ආපදාවලින් මරණ 03 ක් වාර්තා වි තිබෙනවා.
වැඩිම බලපෑමක් එල්ලවී ඇති කොළඹ, ගම්පහ, කලුතර සහ පුත්තලම දිස්ත්‍රික්ක සදහා නිලධාරින් 100 කට වැඩි පිරිසක් යොදවා ඇති බව යුධ හමුදාව කියා සිටියා.
අවශ්‍ය ඕනෑම අවස්ථාවක ආපදා ස්ථාන සදහා පිටත් කර යැවීමට නිලධාරින් සූදානම් කර ඇති බවයි අද පැවති ප්‍රවෘත්ති සාකච්ඡාවේදී ආරක්ෂක ලේකම් සම්පත් තුයියකොන්තා සදහන් කළේ.
මේ අතර, කොළඹ, ගාල්ල, ගම්පහ, කලුතර, කෑගල්ල, කුරුණෑගල, නුවරඑළිය සහ රත්නපුර යන දිස්ත්‍රික්ක සදහා නිකුත් කළ නායයෑමේ අනතුරු ඇගවීම තවත් පැය 24 කින් දීර්ඝ කර තිබෙනවා.
