ඉන්දියාවට එරෙහි තෙවැනි පන්දුවාර විස්සයි 20 ක්‍රිකට් තරගය සුපිරි පන්දුවාරයේ දී පරාජයකින් අවසන් කර ගැනීමට ශ්‍රී ලංකා කණ්ඩායමට ඊයේ රාත්‍රියේ සිදු වුණා.
පළමු තරග දෙකේ දී මෙන්ම මෙම තරගයේ දී ද ශ්‍රී ලංකා මැද පෙල කඩා වැටීමක් සිදු වූ අතර, ඒ අනුව මැද පෙල හා පසුපෙල කඩුලු 7 ක් ලකුණු 22 ක් තුළ දැවී ගියේ පන්දු 25 ක් තුළදීයි.
එම කඩා වැටීම හේතුවෙන් දෙරට අතර පැවැති තරග 3 කින් යුත් විස්සයි 20 තරගාවලිය තරග 3-0 ක් ලෙස ජය ගැනීමට සංචාරක ඉන්දීය කණ්ඩායම සමත් වුණා.
මහනුවර පල්ලේකැලේ ක්‍රීඩාංගනයේ පැවැති තෙවැනි තරගයට වර්ෂාවෙන් බාධා එල්ල වූ බැවින් තරගය ආරම්භ කිරීමට සිදු වූයේ නියමිත කාලයට වඩා පැයක ප්‍රමාදයකින් පසුවයි.
තරගයේ කාසියේ වාසිය දිනූ ශ්‍රී ලංකාවේ ආරාධනයෙන් පළමුව පන්දුවට පහරදුන් ඉන්දියාව පන්දුවාර 20 තුළ කඩුලු 9ක් දැවී ලකුණු 137 ක් ලබා ගත් අතර, පිළිතුරු ඉනිම ක්‍රීඩා කළ ශ්‍රී ලංකාවට ද පන්දුවාර 20 අවසානයේ කඩුලු 8 ක් දැවී ලබා ගත හැකි වූයේ ලකුණු 137 ක් පමණයි.
සුපිරි පන්දුවාරයේ පළමුව පන්දුවට පහරදුන් ශ්‍රී ලංකා ඉනිමේ කඩුලු දෙකම පන්දු 4 ක් තුළ ලකුණු දෙකකට දැවී ගියා .
එහිදී ඉන්දියාව පළමු පන්දුවෙන්ම ජයග්‍රහනය තහවුරු කර ගත්තේ මහීෂ් තීක්ෂණට එරෙහිව සූර්යකුමාර් යාදව් එල්ල කළ හතරේ පහරක් සමගින්.
සුපිරි පන්දුවාරයේ දී කුසල් පෙරේරා හා පැතුම් නිස්සංක ඔවුන් මුහුණ දුන් පළමු පන්දුවලින්ම දැවී ගිය අතර, කුසල් මෙන්ඩිස් නොදැවී ලකුණක් රැස් කළා.
වොෂින්ටන් සුන්දර් යොමු කළ එම පන්දුවාරයේ පළමු පන්දුව වයිඩ් පන්දුවක් වූ බැවින් ශ්‍රී ලංකාවට අතිරේක ලකුණක් හිමි වුණා.
