දඹුල්ල මහනගර සභාවේ වැඩ පාලක වරයෙකු වයස අවුරුදු 12 ක බාලවයස්කාර පිරිමි දරුවෙකුට පසුගිය වසරේදී අපයෝජනයක් සිදුකළැයි චෝදනා පිට 29 දින පස්වරුවේ සැකපිට අත්අඩංගුවට ගෙන තිබෙනවා .
ළමා හා කාන්තා කාර්යාංශයට ලැබුණු තොරතුරක් දඹුල්ල පොලිසියට ලබාදී දඹුල්ල මහනගර සභාවේ වැඩ පාලක වරයා ලෙස කටයුතු කළ දඹුල්ල මහනගර සභාවේ හිටපු නගරාධිපති වරයාගේ සහෝදරයෙකු මෙසේ පොලිසියට භාරවීමෙන් පසු අත් අඩංගුවට පත්වූ බවයි දඹුල්ල පොලිසිය කියා සිටියේ .
ලමා හා කාන්තා කාර්යංශයට දුරකථන ඇමතුමක් මගින් පැමිණිලි ලැබී ඇත්තේ සැකකාර වැඩ පාලකවරයා පසුගිය වසරේ අවස්ථා කිහිපයකදීම වයස අවුරුදු 12 ක පිරිමි දරුවෙකු ළමා අපයෝජනය සදහා යොදා ගත් බවටයි.
ළමා ආරක්ෂණ අධිකාරියේ දැනුම්දීම පරිදි දඹුල්ල පොලිසිය පසුගිය දින කිහිපයේ අවස්ථා ගණනාවක සැකකරු අත්අඩංගුවට ගැනීම සඳහා නිවසට සහ වැඩ පරිශ්‍රයට ගියද ඔහු ප්‍රදේශයෙන් සැඟවී සිටි බව පොලිසිය සඳහන් කළා.
ඒ අනුව සමාජ මාධ්‍ය හරහා දිගින් දිගටම මෙම සැකකරු පිළිබඳව ප්‍රචාරය වෙද්දී සැකකාර වැඩ පාලකවරයා දඹුල්ල පොලිසියට භාර වී ඇතැයි පොලිසිය කියා සිටියේ.
දඹුල්ල පොලීසියේ ළමා හා කාන්තා කාර්යාංශයේ ස්ථානාධිපතිනි පොලිස් පරීක්ෂක නිලූකා විජේසුන්දර මහත්මිය ඇතුළු පොලිස් කණ්ඩායමක් අදාල පිරිමි දරුවා ගෙන් ප්‍රකාශ සටහන් කොට එම දරුවා වෛද්‍යවරයෙකුට ඉදිරිපත් කළා .
එමෙන්ම සැකකරු 30 වන දින දඹුල්ල මහේස්ත්‍රාත් අධිකරණයට ඉදිරිපත් කිරීමට නියමිතයි.
සැකකාර වැඩ පාලකවරයා මීට පෙරද මෙවැනිම සිද්ධියකට අත්අඩංගුවට ගෙන අධිකරණයේ නඩුවක් පවතින බවද පොලීසිය කියා සිටියා .
දඹුල්ල සහකාර පොලිස් අධිකාරී රුක්මල් තෙන්නකෝන් මහතාගේ උපදෙස් පරිදි දඹුල්ල මුලස්ථාන පොලිස් පරීක්ෂක එස්.පී.ඇල්ලෙපොළ ,ළමා හා කාන්තා කාර්යාංශයේ ස්ථානාධිපතිනි පොලිස් පරීක්ෂකා නිලූකා විජේසුන්දර යන නිල නිලධාරීහු තව දුරටත් පරීක්ෂණ පවත්වයි.
.
