බදුල්ල මහ රෝහලේ විදුලි කප්පාදුව ගැන පාර්ලිමේන්තුවේ දී උණුසුම් තත්ත්වයක්

බදුල්ල මහ රෝහලේ පරිශ්‍ර කිහිපයක අද දිනය වන විට විදුලිය කප්පාදු කර ඇති බව විපක්ෂ නායක සජිත් ප්‍රේමදාස මහතා පවසනවා.

විදුලිබිල් නොගෙවීම හේතුවෙන් මෙම කප්පාදුව සිදු කර ඇති බවයි අද පාර්ලිමේන්තුවේදී ප්‍රකාශයක් කරමින් ඔහු සඳහන් කළේ.

ඒ අනුව රජය මැදිහත්ව ඒ සදහා වැඩපිළිවෙලක් යෙදිය යුතු බව ද විපක්ෂ නායකවරයා සඳහන් කළා.

එමෙන්ම හම්බන්තොට දිස්ත්‍රික්කයේ ගිලන් රථවලට ඉන්ධන සැපයීමට මුදල් නොමැති වීම හේතුවෙන් බාධා එල්ල වී තිබෙන බවත් ඒ පිළිබදවද සොයා බලන ලෙස රජයට පවසන බවත් ඔහු සඳහන් කළා.

රජයේ ප්‍රමුඛතම කාර්යය වන්නේ සෞඛ්‍ය ක්ෂේත්‍රය බවත් ඒ අනුව මෙම කාරණා 2 සම්බන්ධයෙන් අද දිනයේම සොයා බලා පිළිතුරක් ලබා දෙන බවත් ඊට ප්‍රතිචාර දක්වමින් මුදල් රාජ්‍ය අමාත්‍ය රංජිත් සියඹලාපිටිය මහතා පැවසුවා.

පාසල් සදහා ජල බිල සියයට 900 කින් ඉහළ දමා ඇති බවත් මෙම බර පාසල් සිසු දරුවන් මත පැටවීමෙන් වැළකි ඊට රජය විසදුමක් ලබා දිය යුතු බවත් පාර්ලිමේන්තු මන්ත්‍රී දයාසිරි ජයසේකර මහතා පැවසුවා.

පාර්ලිමේන්තුවේදී අද ප්‍රකාශයක් කරමිනුයි ඔහු මේ බව සඳහන් කළේ.

මෙම ගැටලුව සම්බන්ධයෙන් අදාළ බලධාරින් දැනුවත් කිරීමට කටයුතු කරන බව ඊට ප්‍රතිචාර දක්වමින් සභානායක, අධ්‍යාපන අමාත්‍ය සුසිල් ප්‍රේමජයන්ත් මහතා පැවසුවා.

එමෙන්ම එළඹෙන අයවැයේදී මේ සම්බන්ධයෙන් යම් ප්‍රතිපාදනයක් වෙන් කිරීමට ද කටයුතු කරන බවයි ඔහු වැඩිදුරටත් සඳහන් කළේ.