පාකිස්ථාන මහ මැතිවරණයේ ප්‍රමාදයක්

පාකිස්ථාන මහ මැතිවරණය පැවැත්වීම තවදුරටත් ප්‍රමාද වන බව වාර්තා වනවා.

එරට පාර්ලිමේන්තුව නිල වශයෙන් විසුරුවා හැරීමට පාකිස්ථාන ජනාධිපති අරීෆ් අල්වි පසුගියදා කටයුතු කළා.

දින 90 ක් ඇතුළත මැතිවරණය පැවැත්විය යුතු අතර එතෙක් භාරකාර රජයක් යටතේ පාලනය ගෙන යා යුතු වනවා.

එම රජයේ නායකයා නම් කිරීමට බලයේ සිටි අග්‍රාමාත්‍ය ෂිබාස් ෂරීෆ්ට සහ ඔහුගේ රජයට දින 3 ක කාලයක් ලබා දී තිබෙනවා.

කෙසේ වෙතත් මැතිවරණය පැවැත්වීමට නම් නව සංගනනයන්ට අනුව මැතිවරණ සීමා නැවතත් සකස් කළ යුතු බවටයි එරට මැතිවරණ කොමිෂන් සභාව පවසන්නේ.

ඒ සදහා මාස 4 ක කාලයක් ගතවනු ඇති බවද සදහන්.

මේ අතර ඉක්වදොරයේ ජනාධිපති අපේක්ෂක ෆර්නැන්ඩු විලාවිසෙන්සියෝ වෙඩි තබා ඝාතනය කර තිබෙනවා.

ජනාධිපතිවරණ ප්‍රචාරක රැලියකට සහභාගි වී සිය මෝටර් රථයට ගොඩවන අවස්ථාවේදී ඔහු ඉදිරියට පැමිණි අයෙකු විසින් හිසට වෙඩි ප්‍රහාර 3 ක් එල්ල කර ඇති බව සදහන්.

එම ස්ථානයේදීම ඉක්වදෝරයේ ජනාධිපති අපේක්ෂකයා මියගොස් ඇති බවයි වාර්තා වන්නේ.