නුගේගොඩ සෞඛ්‍ය වෛද්‍ය නිලධාරි කාර්යාලය (MOH) සහ සෞඛ්‍ය සායන ගොඩනැගිල්ල ජනතා අයිතියට

සම්පූර්ණයෙන් නවීකරණය කරන ලද නුගේගොඩ සෞඛ්‍ය වෛද්‍ය නිලධාරි කාර්යාලය (MOH) සහ සෞඛ්‍ය සායන ගොඩනැගිල්ල සෞඛ්‍ය හා කර්මාන්ත අමාත්‍ය වෛද්‍ය රමේෂ් පතිරණ මහතාගේ ප්‍රධානත්වයෙන් සහ බස්නාහිර පළාත් ආණ්ඩුකාර මාර්ෂල් ඔෆ් ද ඒයාර් ‌ෆෝස් රොෂාන් ගුණතිලක මහතාගේ සහභාගිත්වයෙන් ඊයේ (28) ජනතා අයිතිට පත් කෙරිණි.

මෙම ගොඩනැගිලි ඉදිකිරීමට සෞඛ්‍ය අමාත්‍යාංශය, ප්‍රාථමික සෞඛ්‍ය සවිබල ගැන්වීමේ ව්‍යාපෘතිය, බස්නාහිර පළාත් සභාව, කෝට්ටේ නගර සභාව මගින් ප්‍රතිපාදන ලබාදී ඇත. පළමු අදියර සඳහා වැය වී ඇති මුළු මුදල රුපියල් මිලියන14 කි.

නුගේගොඩ සෞඛ්‍ය වෛද්‍ය නිලධාරි කොට්ඨාසයේ ග්‍රාම නිලධාරි වසම් 15 ක 90,000කට අධික ජනතාවක් සඳහා මෙමගින් සෞඛ්‍ය සේවා සැපයේ.

මෙරට සෞඛ්‍ය සේවාවේ ප්‍රාථමික හා ද්විතීයික සෞඛ්‍ය සේවාවන් ආවරණය වන පරිදි ආයතන 1100ක් පවතින බවත් ද පැවති සෑම රජයක්ම සෞඛ්‍ය සේවා සඳහා වැඩි මුදලක් වෙන් කිරීමට කටයුතු කර ඇති බව වෛද්‍ය රමේෂ් පතිරණ මහතා ප්‍රකාශ කළේය. ප්‍රාථමික මට්ටමක පැවති මෙරට සෞඛ්‍ය සේවාව විශේෂඥ වෛද්‍ය, වෛද්‍ය, හෙද ඇතුළු 150,000 ක පමණ සෞඛ්‍ය කාර්ය මණ්ඩල සමඟ සෞඛ්‍ය සේවා සැපයීමේ ප්‍රතිඵලයක් ලෙස අද වනවිට මෙරට සෞඛ්‍ය සේවාවේ සෞඛ්‍ය දර්ශකය ලොව දියුණු රටවල මෙන් ඉහළ අගයකට ගෙන ඒමට හැකියාව ලැබී ඇති බවද වැඩිදුරටත් ඒ මහතා අවධාරණය කළේය.

‍මෙම අවස්ථාව‌ට කොළඹ දිස්ත්‍රික් පාර්ලිමේන්තු මන්ත්‍රි නීතිඥ මධුර විතානගේ, බස්නාහිර පළාත් සෞඛ්‍ය සේවා අධ්‍යක්ෂ වෛද්‍ය ධම්මිකා ජයලත්, කොළඹ දිස්ත්‍රික් සෞඛ්‍ය සේවා අධ්‍යක්ෂ වෛද්‍ය චන්දන ගජනායක, නුගේගොඩ සෞඛ්‍ය වෛද්‍ය නිලධාරි වෛද්‍ය ඉනෝකා ලියනගේ ඇතුළු සෞඛ්‍ය කාර්ය මණ්ඩල එක්ව සිටියහ.