සිව්වැනි වරටත් ලංකා ප්‍රිමියර් ලීග් ක්‍රිකට් තරගාවලියේ ශූරතාවය දිනා ගැනීමට ජැෆ්නා කිංග්ස් කණ්ඩායම ඊයේ සමත් වුණා.
ඒ,තරගාවලියේ අවසන් මහා තරගයෙන් ගෝල් මාර්වල්ස් කණ්ඩායම පරදා කඩුලු 9 ක විශිෂ්ඨ ජයක් වාර්තා කරමින්.
2020 හා 2021 අදියරවලදී ද ජැෆ්නා කණ්ඩායම එල් පී එල් තරගාවලියේ ශූරතාවය දිනා ගත්තේ ගාලු කණ්ඩායම පරාජයට පත් කරමිනුයි.
කොළඹ ආර්. ප්‍රේමදාස ක්‍රීඩාංගනයේ පැවැති අවසන් තරගයේ කාසියේ වාසිය දිනූ ජැෆ්නා කණ්ඩායම පළමුව පන්දුවට පහරදීමේ අවස්ථාව ගාලු කණ්ඩායමට ලබා දුන්නා,
ඒ අනුව පිටියට පිවිසි ගෝල් මාර්වල්ස් පිතිකරුවන් නියමිත පන්දුවාර 20 තුළ කඩුලු 6 ක් දැවී රැස් කල ලකුණු සංඛ්‍යාව 184 ක්.
ටීම් සයිෆර්ට් පන්දු 37 කින් ලකුණු 47 ක් රැස් කල අතර භානුක රාජපක්ෂ පන්දු 34 ක් පමණක් වැය කරමින් ලකුණු 82 ක් ලබා ගත්තා.
පන්දු යැවීමේ දී අසිත ප්‍රනාන්දු කඩුලු 3 ක් බිද හෙලුවේ ලකුණු 35 ක් ලබා දෙමින්.
පිළිතුරු ඉනිම ක්‍රීඩා කළ ජැෆ්නා කිංග්ස් කණ්ඩායම පන්දුවාර 15 යි පන්දු 4 ක් අවසානයේ එක් කඩුල්ලක් පමණක් දැවී ජයග්‍රාහී ඉලක්කය පසු කර යාමට සමත් වුණා.
කුසල් මෙන්ඩිස් හා රයිලි රුසෝව් සුපිරි පිතිහරඹයක නිරත වෙමින් සිය කණ්ඩායම ජයග්‍රහනය කරා රැගෙන ගියේ ඉනිම නිමා වීමට පන්දු 26 ක් ඉතිරිව තිබියදීයි.
ඔවුන් දෙදෙනා අතර ගොඩ නැගුණු ලකුණු 185 ක සම්බන්ධතාවය එල් .පී එල් ඉතිහාසයේ දී පිතිකරුවන් දෙදෙනෙකු අතර ගොඩ නැගුණු හොදම සම්බන්ධතාවයයි.
මෙවර තරගාවලියේ දී තමන් වාර්තා කළ දෙවැනි ශතකය ද වාර්තා කළ රයිලි රුසෝව් පන්දු 53 කින් නොදැවී ලකුණු 106 ක් ලබා ගත්තා.
කුසල් මෙන්ඩිස් පන්දු 40 කින් නොදැවී ලබා ගත් ලකුණු සංඛ්‍යාව 72 ක්.
මෙම අවසන් තරගය නැරඹීම සදහා සහ සම්මාන ප්‍රදානෝත්සවය සදහා ජාත්‍යන්තර ක්‍රිකට් කවුන්සලයේ සභාපතිවරයා ද එක්ව සිටියා.
අවසන් මහා තරගයේ වීරයා හා තරගාවලියේ වීරයා සම්මානයෙන් පිදුම් ලැබුවේ ජැෆ්නා කණ්ඩායම නියෝජනය කල දකුණු අප්‍රිකානු ක්‍රීඩක රයිලී රුසෝව්. තරගාවලියේ නැගී එන ක්‍රීඩකයාට හිමි සම්මානය දඹුල්ල කණ්ඩායම නියෝජනය කල චමිදු වික්‍රමසිංහ විසින් දිනා ගත්තා.
