උණ රෝගය වැලදුනු ගාල්ල බන්ධනාගාරයේ සිටි තවත් රැඳවියන් තිදෙනෙකු ප්‍රතිකාර සදහා කරාපිටිය ශික්ෂණ රෝහලට ඇතුලත් කර තිබෙනවා. මීට පෙර රැදවියන් 5 දෙනකු ප්‍රතිකාර සඳහා රෝහල්ගත කෙරුණු අතර ඉන් දෙදෙනෙකු ජීවිතක්ෂයට පත් වුණා.
උණ රෝගී තත්ත්වය හේතුවෙන් රැඳවියන් මිය යාමත් සමග කරාපිටිය ශික්ෂණ රෝහලේ වෛද්‍ය කණ්ඩායමක් ගාල්ල බන්ධනාගාරයට පැමිණ ඒ පිළිබඳව විමර්ශනයක් ආරම්භ කර තිබෙනවා.
ඒ අනුව අනාවරණය වී ඇත්තේ බැක්ටීරියා ආසාදනයක් හේතුවෙන් මෙලෙස රැදවියන් රෝගී වී ඇති බවයි.
අදාළ බැක්ටීරියා ආසාදනයට අනුව පුද්ගලයින් හට උණ සහ සමේ ආසාදන තත්ත්වයක් ද පෙන්නුම් කරන බවටයි වාර්තා වන්නේ.
මියගිය රැඳවියන් දෙදෙනාගේ පශ්චාත් මරණ පරීක්ෂණය කරාපිටිය ශික්ෂණ රෝහලේදී ඊයේ පවත්වා ඇති අතර එහිදී වෛද්‍යවරුන් විවෘත තීන්දුවක් ලබා දී තිබෙනවා. ඒ අනුව ඔවුන්ගේ සිරුරු කොටස් රජයේ රස පරීක්ෂකවරයා වෙත යැවීමටයි පියවර ගෙන ඇත්තේ.
මියගිය රැදවියන්ගේ සිරුරු වල කිසියම් බිබිලි වර්ගයක්ද දක්නට ලැබෙන අතර ඔවුන් රෝහල් ගත කර ඇත්තේ ස්වසන අපහසුතා හේතුවෙන්.
එමෙන්ම ඔවුන් දෙදෙනාම මත්ද්‍රව්‍යවලට ඇබ්බැහිවූවන් වන අතර බන්ධනාගාරගත වී ඇත්තේද මත්ද්‍රව්‍ය චෝදනා වලට බවයි පොලිසිය සඳහන් කළේ.
ඊයේ සහ පෙරේදා මියගිය රැඳවියන් දෙදෙනා ගාල්ල, මොරගොඩ සහ අහන්ගම ප්‍රදේශයේ පදිංචිකරුවන් බව සඳහන් .
ගාල්ල බන්ධනාගාරයේ සිරකරුවන් 1000 කට වැඩි පිරිසක් රදවා සිටින බවටයි වාර්තා වන්නේ.
මේ අතර බන්ධනාගාර රැදවියන් හට මුඛ ආවරණ පළදින ලෙසටයි උපදෙස් දී ඇත්තේ.
