කෙහෙළිය ඇතුළු 23 දෙනෙකුට නියෝගයක්

සෞඛ්‍ය අමාත්‍ය කෙහෙළිය රඹුකවැල්ල, සෞඛ්‍ය සේවා අධ්‍යක්ෂ සහ නීතිපතිවරයා ඇතුළු 23කුට එරෙහිව ගොනුකළ මුලික අයිතිවාසිකම් පෙත්සමේ කරුණු තහවුරු කිරීම සදහා ලබන 14 වනදා කැඳවීමට ශේෂ්ඨාධිකරණය දින නියම කළා .

හම්බන්තොට දිස්ත්‍රික්කයේ මන්දපෝෂණ තත්ත්වය ඉහළ යා හැකි බවට මාධ්‍ය හමුවක ප්‍රකාශ කිරීම මුල් කරගෙන, තමාගේ වැඩ තහනම් කිරීමට සෞඛ්‍ය අමාත්‍යවරයා සහ රාජ්‍ය සේවා කොමිෂන් සභාව ගත් තීරණය අභියෝගයට ලක් කරමින් වෛද්‍ය චමල් සංජීව මහතා විසින් මෙම මුලික අයිතිවාසිකම් පෙත්සම ගොනුකර තිබෙනවා .

බුවනෙක අළුවිහාරේ, ගාමිණී අමරසේකර සහ මහින්ද සමයවර්ධන යන ත්‍රිපුද්ගල විනිසුරු මඬුල්ල හමුවේ පෙත්සම කැඳවනු ලැබුවා .

තමන්ට එරෙහි අදාළ තීරණය ගත් සෞඛ්‍ය අමාත්‍යවරයා ඇතුළු බලධාරීන්ගෙන් රුපියල් ලක්ෂ 100 ක වන්දියක් අය කර දෙන ලෙසයි පෙත්සම්කරු, ඉල්ලා ඇත්තේ.

තමන් පසුගිය සැප්තැම්බර් 19 වැනිදා මාධ්‍යය හමුවේදී එම ප්‍රකාශය කළේ නිසි අධ්‍යයනයකින් අනතුරුව බවයි වෛද්‍ය චමල් සංජීව මහතා පෙන්වා දෙන්නේ.

එමන්ම ඒ මහතා සදහන් කරන්නේ තමා සතු භාෂණයේ අයිතිය ආයතන සංග්‍රහයකින් සීමා කළ නොහැකි බවයි.

තමාගේ අධ්‍යාපන සුදුසුකම්වලට සරිලන තනතුරක තමා වහාම පිහිටුවන ලෙස ද ඒ මහතා ශ්‍රේෂ්ඨාධිකරණයෙන් ඉල්ලා සිටිනවා.