උසස් පෙළ විභාගය සමයේ විදුලි කප්පාදුවට වන දේ

අ.පො.ස උසස් පෙළ විභාගය හේතුවෙන් ඊයේ දිනයේ සිට විභාගය අවසන් වන ලබන පෙරවාරි මස 17 වැනිදා දක්වා විදුලිය කප්පාදුව අත්හිටුවීමට බලධාරීන් එකඟ වූ බව ශ්‍රී ලංකා මානව හිමිකම් කොමිසම පවසනවා.

උසස් පෙළ විභාගය පැවැත්වෙන කාල සීමාව තුළ අඛණ්ඩව විදුලිය සැපයීමට අවශ්‍ය ඉන්ධන ලබා දෙන ලෙස ශ්‍රී ලංකා මානව හිමිකම් කොමිසම සහ මහජන උපයෝගිතා කොමිසම, ඛනිජ තෙල් නීතිගත සංස්ථාව වෙත යෝජනා කළ බවත්, ඒ සඳහා වැය වන පිරිවැය අය කර ගැනීමට අවශ්‍ය කොන්දේසි මෙන්ම ඉදිරියේ සිදු කිරීමට යෝජිත විදුලි ගාස්තු සංශෝධනයේදී ගෙවීමට ප්‍රමුඛතාව දිය යුතු යැයි විදුලිබල මණ්ඩලයට මහජන උපයෝගිතා කොමිසම උපදෙස් ලබා දුන් බවත්, ශ්‍රී ලංකා මානව හිමිකම් කොමිසම සඳහන් කළා.

විදුලිබල හා බලශක්ති අමාත්‍යංශය මෙම සමථය ක්‍රියාත්මක කිරීම සඳහා අවශ්‍ය සම්බන්ධිකරණය සහ පහසුකම් සැපයීමට මැදිහත් විය යුතු බවත්, එම අවස්ථාවේ සමතයට ශ්‍රී ලංකා මානව හිමිකම් කොමිෂන් සභාව නිර්දේශ වශයෙන් ඇතුළත් කර නිර්දේශ ක්‍රියාත්මක කිරීමට මහජන උපයෝගිතා කොමිසම එකඟ බවත්, එම කොමිසම වැඩි දුරටත් සඳහන් කර තිබෙනවා.

කෙසේ වෙතත් උසස් පෙළ විභාගය පැවැත්වෙන කාලයේදී අඛණ්ඩව විදුලිය සැපයීම සඳහා සාකච්ඡා කිරීමට ශ්‍රී ලංකා මානව හිමිකම් කොමිසම ඊයේ පස්වරුවේ බලශක්ති අමාතයංශයේ ලේකම්, ශ්‍රී ලංකා මහජන උපයෝගිතා කොමිසම, ලංකා විදුලිබල මණ්ඩලය, ඛනිජ තෙල් නීතිග සංස්ථාව, ලංකා බැංකුව සහ මහජන බැංකුවේ සභාපතිවරුන් එම කොමිසම හමුවට කැඳවා තිබුණා.