උතුරේ ජනතාවට මෙතෙක් දේශපාලන නිදහස ලැබී නැති බව ශානක්‍යම් රාසමානික්කම් කියයි

දකුණේ ජනතාවට ආර්ථික නිදහස නොමැති වුවත් දේශපාලන නිදහස ලැබී ඇති බව පාර්ලිමේන්තු මන්ත්‍රී ශානක්‍යම් රාසමානික්කම් මහතා පවසනවා.

නමුත් උතුරේ ජනතාවට මෙතෙක් දේශපාලන නිදහස ලැබී නොමැති බවයි ඒ මහතා පෙන්වා දෙන්නේ.

අද පැවති මාධ්‍ය හමුවකට එක්වෙමින් පාර්ලිමේන්තු මන්ත්‍රී ශානක්‍යම් රාසමානික්කම් මහතා මෙම අදහස් පල කළා.

මේ අතර සමගි ජනබලවේගය කැඳවා තිබූ මාධ්‍ය හමුවකදී 13 වන ආණ්ඩුක්‍රම ව්‍යවස්ථා සංශෝධනය පිළිබඳ මාධ්‍යවේදීන් කොළඹ නගරාධිපතිධූර අපේක්ෂක මුජිබර් රහුමාන් මහතාගෙන් විමසා සිටියා.

ඔහු සඳහන් කළේ තම පක්ෂය 13 වන ආණ්ඩු ක්‍රම ව්‍යවස්ථා සංශෝධනයට එකඟ බවයි.

කෙසේ වෙතත් මාධ්‍ය හමුවක් අමතමින් පූජ්‍ය උලපනේ සුමංගල හිමි ප්‍රකාශ කළේ 13 වන ආණ්ඩුක්‍රම ව්‍යවස්ථා සංශෝධනය ක්‍රියාත්මක කිරීමට එරෙහිව ලබන 08 වන දා 5000ක් භික්ෂූන්වහන්සේලා කොළඹට පැමිණීමට නියමිත බවයි.

මේ අතර 13 වන ආණ්ඩුක්‍රම ව්‍යවස්ථාවට විරෝධය පළ කරමින් මහනුවර ශ්‍රී දළදා මාලිගාව ඉදිරිපිටදී සත්‍යග්‍රහයක්ද පැවැත්වුණා.