ඉහළ දමන ලද ඉන්ධන කෝටාව අද මධ්‍යම රාත්‍රියේ සිට ක්‍රියාත්මකයි.
ඒ අනුව යතුරුපැදියකට සහ ත්‍රිරෝද රථයකට ලබාදෙන ඉන්ධන කෝටාව ලීටර 14 දක්වා ඉහළ දමා ඇති බවයි විෂය භාර අමාත්‍ය කංචන විජේසේකර මහතා ප්‍රකාශ කළේ.
මීට පෙර යතුරුපැදියක් සඳහා සතියකට ලීටර් 7 ක් සහ ත්‍රිරෝද රථයක් සඳහා ලීටර් 08 ක් ලබා දී තිබුණා.
එමෙන්ම ලියාපදිංචි ත්‍රිරෝද රථ සඳහා ලබා දී තිබූ ඉන්ධන කෝටාව ද ලීටර් 15 සිට ලීටර් 22 දක්වා ඉහළ දමා තිබෙනවා.
එමෙන්ම බස් රථ සඳහා ලබා දී තිබූ ඉන්ධන කෝටාව ලීටර් 125 දක්වා ඉහළ නැංවීමටයි පියවර ගෙන ඇත්තේ.
බස් රථ සඳහා මීට පෙර ලීටර් 60 ක ඉන්ධන කෝටාවක් ලබාදීමට රජය කටයුතු කර තිබුණා.
මීට අමතරව මෝටර් රථ සඳහා ලබා දී තිබූ ඉන්ධන කෝටාව ද ලීටර් 30 සිට 40 දක්වා ඉහළ නංවා තිබෙනවා.
එමෙන්ම ලොරි රථ සඳහා ලබාදී තිබූ ඉන්ධන කෝටාව ද ලීටර් 75 සිට 125 දක්වා ඉහළ නැංවීමට පියවර ගෙන ඇති බවයි අමාත්‍ය කංචන විජේසේකර මහතා ප්‍රකාශ කළේ.
